کابل ټکی کام ۰۳/ سنبله
۱۳۹۴ لیکوال: نعمان لطیف
تاریخ یو داسې کتاب دی چې د هیچا مخ مروت نه کوي ، هر څه په ډېره سپین سترګۍ سره پخپلو پاڼو کې ثبتوي او راتلونکي نسلونه له مخکنیو هغو باخبره ساتي ددغې کتاب ټول قضاوتونه او ساتنې که څه هم سل پر سله دقیق او راڼه نه وي خو بیا هم آئنده نسلونو ته د ماقبلهم افکار لیږدوي او ورښایي چې څوک څنګه مخ ته ولاړ او څوک ولې ښکته ولاړ؛ احزاب یې منحل او لارویان یې ولې دماضي تشه افسانه شوه د افغانستان دڅلورو لسیزو تریخ او بېخونده ناورین دتاریخ پاڼو ته په رڼو حقایقو او کره څېرو سربیره یو څو لانجمنې څېرې او خاطرې هم ور وزیاتې کړي ځنې خلک یې دتاریخ پاڼو ته دمړ او غدار په نوم ولیږدول خو په وروستیو کې دشهید او اتل په نوم ونومول شول او ځنې یې بیا دشهید په نوم ورثبت کړه اما نن مردار او غدار بلل کیږي. دهمدې لانجمنو څېرو څخه یوه معروفه څېره چې تاریخ به یې هم په اړه دوه ګونی قضاوت کوي او یا به یې بوچ له غېږې باسي ښاغلی انجینرګلبدین حکمتیار دی ګلبدین حکمتیار د افغانستان د وروستیو لسیزو تجربه کار او لوبېدلی لوبغاړی پاتې شوی او ډېری افغانان په دې نظر دي چې حکمتیار صیب د پاکستان د مولانا فضل الرحمان په څېر په هر نظام کې هم داخل او هم خارج دی دډاکټر نجیب سره یې دیموکراسي او ملي مصالحت نه مانه خو دمجاهدینو لپاره یې دیموکراتیک نظام تائیداوه او نن هم د دیموکراسۍ نعرې وهي زه یې دا نظر تائیدوم چې د کمونستانو سره یې ملي مصالحت رداوه خو دېته تعجب کوم چې دیموکراسۍ ته ژمن دی او دیموکراسۍ طبعا ټول شموله وي په دې معنا چې کافر او مسلمان ، کمونست او مجاهد ، روغ او ناروغ ، امیر او فقیر ، جوالي او والي ټول یو مخ کولی شي په دیموکراتیکه ټولنه کې ځان تر لوړو پوستونو ورسوي او د واک واګې په لاس کې واخلي. لهذا انجینرصیب کومه دیموکراسي غواړي چې کمونست او کافر دې ورکې له دیموکراتیکو مدني حقوقو محروم وي؟ ښاغلي ګلبدین حکمتیار ډاکټر نجیب ونه مانه خو ستر کمونست شاه نواز تڼۍ یې څنګ ته کښېناوه او پر شاه یې ټپاوه یو بل کمونست او خونکار جنرال دوستم یې دهماهنګي شوری مرکزي مهره وګرځوله او څو څو واره یې اتحادونه ورسره وکول دصبغت الله مجددي پر خلاف د استاد رباني سره ودرېد او د استاد رباني د واک پر خلاف یې دچهار آسیاب او تګاب غرونو ته مخه کړه دطالبانو سره یې جنګ ته مټې بډ وهلې او بیا د استاد رباني پښو ته ولوېد او په جنګ یې لاس پورې کړ طالبانو ډېر زر د رباني د واک ټغر ورټول کړ ، رباني بدخشان او بیا تاجکستان ته سره له چوکۍ وتښتېد او ښاغلی ګلبدین ایران ته پر تېښته بریالی شو په ایران کې یې د ایراني اخندانو په وینا په طالبانو پسې د \’پټې توطیې او بربنډې څېرې\’ په نوم یو کتاب ولیکه او طالبان یې دپاکستان بې معاشه پوځ وباله حال دا چې د ګلبدین حکمتیار د ګوند جوړښت ، دده او دده د افرادو ټریننګ او اعاشه او اباطه تر نن ورځې اسلام اباد ورکوي د امریکایي اشغال پر مهال ښاغلی له ایرانه ووت ، د امریکایي اشغال پر خلاف یې د یوې خوندورې پرېکړې له مخې د امریکایانو سره دجهاد اعلان هم وکړ او افغانستان یې اشغال وباله لږه موده وروسته یې ملا محمدعمر مجاهد \’رح\’ د افغانستان د تاریخ تر ټولو دغوره پاچا په نوم یاد کړ خو د وردګو په نرخ کې یې دملا محمدعمر مجاهد د پوځیانو مخه کلکه ډب کړېوه او بالآخره د اندړو د اربکیزم د پروژې بنیاد حزبي قومندانانو کېښود حزبي قومندانان په زیاته اندازه په حکومت کې ورګډ شول ، په ګوند دننه دحکمتیارصیب د هغو سیاسي حریفانو چې په نظام کې شریک ول مخه یې ونېوله او دحامد کرزي په نظام کې نیم نیمایي شو ټولټاکنو ته یې مستقل کاندید ونوماوه او له رسمي ادرسونو څخه یې ورته په کمپاین لاس پورې کړ دقطب الدین هلال غوڅ شکست دحزب دخیالونو او خوبونو ماڼۍ وړچولې او دحزبیانو اعصاب یې سره ګډ وډ کړه په عراق کې دداعش څرګندېدل او بیا دنړیوال خلافت دقیام ادعاوو ښاغلي ته نوی څراغ او نوی فکر په لاس ورکړ دا وار حکمتیار دواعشو ته دنږدېکت سوچونه ووهل او دهمدې سوچونو له امله یې ایران تر قلمي برید لاندې ونیو ایراني اخندان او دده د کلونو کوربانه او لارښودان یې اسلام ته تر اسرائیلو خطرناک وبلل او شیعه ګان یې تر سختو نېوکو لاندې راوستل حکمتیار غوښتل چې خپل اسلامي رقیب \’طالب\’ په داعش وټکوي او دزړه بړاس یې کښیني. ځکه یې په شیعه ګانو پسې کومی واز کړ ایراني اخندان یې دمطبوعاتو له لارې وټکول او بیا یې وغوښتل چې په یو غشي دوه ښکاره وکړي. هم به طالبان په دواعشو مات کړي او هم به یې اسلامي حیثیت پر ځای پاتې شي حکمتیار په ډېر سرعت او جرأت سره دطالبانو پر وړاندې له داعشه ملاتړ وکړ او طالبان یې دده په وینا دحزب قسم خوړلي دښمنان وګڼل خو له بده مرغه چې دا وار ښه سم وخویده دداعشیانو سره که دنړۍ په هر ګوټ کې یو کمکی مجاهد دپیوستون غږ وکړي زر تر زره یې داعشي سایټونه او پاڼې رسنیز کړي او هاوهو جوړ کړي خو دبیچاره ګلبدین په ملاتړ کبرجنو داعشیانو دمننې پر دود دخولې چوله کولو زیار هم ونه ویست او په هېواد دننه هم دحکمتیار پرېکړه د افغانانو لخوا دجدي عکس العمل سره مخ شوه آن تر دې چې دحزب په منځ کې یې سخت درز واچاوه او له مخکې څخه پاشل شوی حزب یې دمنحل کیدو له خطر سره مخ کړ تجربه کاره ګلبدین او مکاره زامنو یې په خورا سپین سترګۍ سره ددواعشو دملاتړ پرېکړه بېرته رد کړه ، دا یې ددښمن افتراء وبلله او په بیړه یې همایون جریر چې دحکمتیار زوم دی ارګ ته ولیږه او دوه ورځې وړاندې یې یو بل پلاوی کابل ته دسولې لپاره واستاوه تر څو د اشرف غني منت وکړي او په سنګر!! کې یک تنها پاتې ګلبدین ته د وړو پزه ورجوړه کړي زه نه پوهیږم چې تاریخ به دداسې چا په اړه څنګه قضاوت وکړي چې دچور او تالان په نظام کې صدر اعظم او مخالف جګړه مار ، دتحمیلي دیموکراسۍ دغلا او تالا په نظام کې نیم نیمایي شراکتي و هم دسنګر مدعي ، دطالبانو په سوچه اسلامي نظام کې اېغ نېغ مخالف او داسلام دښمنه ایرانیانو میلمه او د کمونستانو دملي وحدت! په نظام کې دکمونستانو دڅوکۍ دڅنګ یار او مددګار ؛ خو دا باید ووایم چې دحکمتیارصیب دواک حرص او محبت دده په ټولو پرېکړو جوره اغېز لري او دواک مینې ړوند کوڼ اچولی. نه یې اسلامي حیثیت برقراره وساتلی شو او نه ملي او په راتلونکې کې به یې ولس هم هرې پرېکړې او کړنې ته حتما د شک په سترګو وګوري. یادونه: کابل ټکی کام یوه آزاده خپلواکه ناپېیلې پاڼه ده. هر متدین افغان وګړۍ کولای شي خپل آواز ددې لارې تر خلکو ورسوي. د هر لیکوال لېکنه مونږ بې له سانسوره او بې تبعیضه خپروو او د لیکوالانو له نظر سره د ادارې توافق شرط ندی –
