ليکوال : امين وردګ
افغانان مخکې لا پوهېدل چې : د سولې پروسه يوه پروژه ده ، نه حقيقي حرکت ، ځکې چې ؛ ټيکه داران يې ډېرى د سولې دښمنان دي ؛ مګر دا چې له چا سره ښکاره او کره دليل نه ٶ(تر څو يې ملت ته وړاندې کړي) نو ځکه به ډېری وختونه مدعا بې ارزښته پاتې شوه.
مګر ښه شو چې : اوس یو ځل بیا دولت هغه خپل کرغېړن رنګ موږ ته څرګند کړ او ځان يې وښود چې ؛ د زرکې په جامو کې زرکې هم نيولای شي.
څو کاله وړاندې د کندهار پوهنتون يو پياوړى محصل ليکوال (بشيراحمد ريان) د ملي امنيت له خوا ترور او بيا يې تر سختو شکنجو وروسته زېړ ځبېښلى شهيد جسد د بولد ولسوالۍ اړوند په یوه سيمه کې د سرک له غاړې وموندل شو.
همداراز… تېر کال د افغانستان يو بل پياوړى ليکوال او شناند ښاغلى (انجنير نظرمحمد مطمئن) هم د ملي امنيت له خوا و نيول شو ، مګر بيا زر بېرته خوشې کړل شو ، خو متأسفانه چې څو ورځې وړاندې يو ځل بيا د همغه کرغېړن (او د مظلوم ملت په وينو رنګ) ارګان له خوا نيول شوى او لا تر اوسه يې درک نشته ؛ څوک نه دي خبر چې : په کومه ګناه نيول شوى او چېرې به د تورو تمبو شاته پروت وي ؟
زما په اند :
نوموړى يوازې له همدې امله ګواښکل کيږي چې : حق وايي او په حق ويلو کې له هېچا هم وېره نه کوي.
ښاغلى مطمئن په ريښتيا سره د سولې لپاره کوټلي پلونه اخلي.
نظر محمد مطمئن غواړي چې : په افغانستان کې نورې بې هوده وينې تويې نشي.
نوموړى نه غواړي چې : د افغان دولت واګې دې ، د غلو رهزنو او د ملت د قاتلانو په لاسو کې نورې پاتې شي.
هو ! نظر محمد مطمئن طالبان ترورستان نه بولي ، د هغوى پر ځاى غربي ښکېلاکګرو ته دهشتګرد وايي ، مطمئن هغه چاته مزدور وايي چې : په ناحقه د افغانانو وينې تويوي.
مطمئن وايي چې : طالبان په ريښتيا سوله غواړي ، مګر افغان دولت د سولې تر نامه لاندې غواړي خپل نور مخالفين هم د حکمتيار او ځينو نورو…رهبرانو په توګه تر خپل دم او ودم لاندې راولي.
مطمئن صاحب چې کوم کتاب د (طالب مشرانو سره شپږ ورځې) تر نوم لاندې ليکلى ؛ نو په هغه کتاب کې د ده ناپلوي ، شخصيت ، صداقت ، ريښتينولي ؛ سولې ته ژمنتيا او لېوالتيا ، له ليري ښکاري.
مطمئن د دولت د ځينو کرايه کښو سياسيونو په توګه چلند د خپل ضمير او وجدان د قضاوت په قانون کې تر ټولو سپک موقف بولي ، ځکه د هر چا د سترګو اغزى دى.
نوموړی داسې يو پياوړى منطق لري چې : کله به يې پوښتنه مطرح کړه نو د حريف او مقابل لوري په ستوني به يې ته وا سمدم پل ورکېښود ، خبره به يې په مرۍ کې ور وچه کړه.
مطمئن په ټول وخت کې يو طرفه قضاوت نه دى کړى او نه يې چېرې هم د طالبانو دفاع کړې ؛ مګر هو !يوازې په هغه صورت کې به يې د طالبانو له لوري دليل وړاندې کړ چې : په هغوى پسې به چا دروغ وتړل ، هغه کار به يې هم د سولې لپاره کولو ، يانې غوښتل يې چې ملت کوم دروغين فريب ونخوري ؛ نور به يې ټول وخت د دريمګړي په توګه نه ستړي کيدونکي ګامونه اخيستل.
مطمئن له وړاندې لا مطمئن ٶ چې : اجيره څانګه به کومه ورځ توره خولۍ ور په سرکوي او په کوم تور به يې په خپلو شيطاني لومو کې ګيروي.
د مطمئن له اوس نيولو دا ښکاره شوه چې : دولت د هغه ځواب نه لري ؛ نو بايد يو ډول دوسيه ورته جوړه کړي او دا د سولې ريښتينه کوتره څه وخت په قفس کې وساتي او يا خو يې لږترلږه له بياځلې حقائقو راسپړلو پښېمانه کړي.
خو زما دا يقين دى چې : مطمئن به هم د رويان لاره خپلوي او د همدغې قاتل نظام له لوري به په شهادت رسيږي ، ځکه : دا نظام داسې څوک نشي زغملاى چې ؛ دوى ته يې عيب ور په ګوته کړي او يا د طالب مشرانو ريښتينولۍ ته ژمن وي ؛ دوی غواړي چې : خلک ړانده او کاڼه وساتي ؛ تر څو خپلې تورې او منحوثې څېرې ورباندې و مني ، خو مطمئن داسې څوک نه دى چې ؛ چاته به سرټيټوي ، نو ارومرو به يې يوه ورځ دا نه ټيټېدونکى سر ور پرې هم کړي ؛ خو ښه به دا وي چې : نوموړى نور خپل موقف بدل کړي او د داسې بې رحمه دښمن نه ليرې شي چې : د ځواب ورکولو پر ځاى يې وژل او تحديدول خوښيږي.
دا تر ټولو سپک کار دى چې : يو آزاد ، بې وسلې ، او خپلواک ليکوال په دومره وحشت سره نيول کيږي.
مطمئن ته پکار ده چې : نور د زمرو ځنګل ته لاړ شي او تر دې هاخوا په شغالانو باور و نه کړي او نه پکې و اوسيږي.
اوس که ولسونه پرته له الله وېره نه لري ، نو بايد له دولت نه وغواړي چې : هر څومره زر دغه افغان ستورى را خوشې کړي او بل وخت داسې ماشومانه حرکت تکرار نه کړي.
