په کابل کې به ولې اوبه نه وچيږي؟
کابل غږ
ع- خاموش
د کابل ښار اوسېدونکي وايي چې په څاګانو کې اوبه د ځمکي تل ته تللې دي (ډيرې ټيټې شوې دي) چې په زياتو سيمو کې د کورونو څاګانو کې اوبه نه ترلاسه کيږي. خلک د ورځني ژوند د اړتياوو پوره کولو لپاره له لیرې سيمو څخه اوبه راوړي. د کابل ښاريان د څښاک د اوبو له ستونزو سره مخ دي.
پخوا به د حکومت لهخوا په غځېدلو نلونو کې اوبه راتللې؛ خو دا ډېر وخت کېږي، چې هغه هم وچې شوي او په ورته وخت کې د څاه کېندلو بیې هم لوړې شوېدي.
له يوې خوا د کابل ښار اوبه له روغتیايي اړخه هم خرابې دي او له بلې خوا د کابل ښار اوس هغه د کابل پخوانی ښار نه دې چې کوم پنځوس کاله دمخه ورته ښکلی کابل ويل کېده. اوس هغه ښار له کثافاتو ډک ښار دى چې د ښاروالۍ لخوا د ښاريانو ژوند له مرګ سر مخ دى، خو هسې یې لا د ژوند دانه په دنيا شته.
وچکالي د کابل ښار لپاره ستر ګواښ دى. امکان لري چې د وچکالۍ او اوبو نشتوالي له امله د کابل ښار له ځېنو سیمو خلک کډه وکړي. ځکه د نفوسو ډېرېدل، د اوبو ناسالم مدیریت او د اوبو د زېرمو نشتوالی د دې لامل شوی چې په څاهګانو کې اوبه وچې شي.
د اوبو او انرژۍ وزارت په خپله ناځوابۍ سره وايي، ښاریان بايد د اوبو له بېځایه لګولو مخنیوی وکړي. په پښتو کې یومتل دی، وايي: په کوم کور کې چې بې اتفاقي او بدنیتي راشي، په منګیو کې هم اوبه وچیږي.
د اوبو کچه به ټيټيږي او له کابله به خلک کډې کوي؛ ځکه دا دی اورېدل کيږي چې دوستم بيا کابل ته راځي. هغه دوستم چې د درې قومونو مشران ورسره په څنګ کې ولاړ دي. لومړی خو د دوستم په موجوديت له حکومته خلک ناراضه دي، دویم که عطا نور بيا د يوه ترکي ائتلاف په شکل کې کابل ته ستون شو، نو هغه نور به نه وي. عطا نور وار له مخه ویلي: که واک ترلاسه کړي په ډېرو به تیاره کړم. او درېیم که محقق ته حکومت د ائتلاف په توګه قانع شو، نو بيا د خيتځو ولاياتو خوځښت او د لوی کندهار خلک هم په ارام نه کښېني؛ ځکه د درې ګوني ائتلاف مشران د ملت خير نه بلکې د ملت په بې خیرۍ کې خپل خير غواړي؛ نو په کابل کې به ولې اوبه نه وچيږي.
