تبصره
شپاړس کاله د مخه چې د امريکا په سوداګريز مرکز په ډرامايي توګه بريد وشو، امريکايي چارواکو وويل چې د دې غچ به په افغانستان کې په شپاړس ساعتونو کې له القاعدې اخلو. ځینو امريکايي نظاميانو په شپاړس ورځو کې د خپل غچ اخستلو هوډ درلود.خو چې پر افغانستان یې بريد وکړ، د شپاړسو ساعتونو او شپاړسو ورځو جګړه شپاړس کالو ته ورسېده.
له دې ټوله نړې خبره ده او ورته د سي آى اې پاليسي څرګنده ده چې کوم هېواد ته امريکا پوځونه لېږلي دي، بيا ېې ترې نه دې ایستلي، هلته یې په يوه او بل نامه ناامني جوړه کړې ده. د ملګرو ملتونو د امنيت، د بشر د حقوقو، روغتيا او نورو…. سازمانونه د امريکا په لاس کې دي، هر څه چې ورته ووايي هغه عملي کوي، پر کوم هېواد چې امريکا وغواړي اقتصادي بنديزونه پرې لګولاى شي. د اقتصادي بنديزونو مهر په سپينه ماڼۍ کې ايښی دى، خو په افغانستان کې چې خپله امريکا هر ډول جنايات کوي، د ملګرو ملتونو ټولو سازمانونو پرې سترګې پټې او غوږونه کاڼه کړې دي.
په برماکې وحشي پوځيانو روهنګيايي مسلمانان په خپلو جونګړو کې وسوځول، تر درې لکو پورې روهنګيايي مسلمانان بنګله دېش ته کډه شول، له هغو سره یې په ظلمونو سترګې پټې کړې دي، هلته د امنيت شورا د افغانستان په څېر وحشتونه نه ویني او نه د امنيت شورا هغه څه ګوري چې پر افغانانو او روهنګيايي مسلمانانو تېرېږي.
په افغانستان کې چې کومه جګړه روانه ده، دا دافغانانو ترمنځ ده خو د همدې افغانانو، چې سره په جګړه اخته دي، پر خلاف ده؛ که له همدې افغانانو، حکومتي ځواکونو او وسله والو طالبانو وپوښتل شي، دواړه د جګړې خلاف دي، خو توپير یې دا دى چې حکومتي ځواکونه جګړې ته راښکل کېږي او پر ولس (طالبانو) جګړه تپل شوې ده. شپاړس کاله خو په دې توګه تېر شول.
اوس په هېواد کې د جګړې په اړه ويل کېږي چې نور پوځونه افغانستان ته رالېږل کېږي، که په افغانستان کې د امريکا د جګړې قوماندان نيکولسن وغواړي، نورو پوځونو ته اړتيا ده، د دې په څېر به نور پوځونه هم راولېږي چې شپاړس کلنه جګړه نوره هم اوږده کړل شي.
تېره ورځ چې د امريکا په سنا مجلس کې د افغانستان په اړه د جګړې د گټو او تاوانونو بحث کېده، وويل شول چې پنځوس کاله به نوره هم په افغانستان کې جګړه روانه وي. هغه په دې دليل چې دوی په افغانستان کې له افغان چارواکو سره د (٩) نظامي اډو لاسليکونه کړي دي. تر پنځوسو کالو پورې به افغانستان د جنوبي او منځنۍ اسيا لپاره يوه مورچه وي، چې په اسانۍ سره ترې نورو هېوادونو ته پوځي اکمالات کولاى شي.
امريکا نه غواړي په افغانستان کې جګړه پای ته ورسوي. د نورستان په برګ مټال کې يوه اونۍ وشوه چې جګړه روانه ده. حکومتي ځواکونه تراوسه په دې نه دي توانېدلي چې خپله محاصره ماته کړي. دا مهال په شپږو ولاياتو کې زياتې ولسوالۍ د وسله والو طالبانو په واک کې دي. حکومتي ځواکونه د بهرنيانو په شمول چې څو څو واره یې ګډ عمليات وکړل، له طالبانو یې نيول شوې ولسوالۍ ونه نيولې.
اوس په افغانستان کې امريکايي قوماندان وايي چې قاطع ماموريت (!)؛ دا هغه جمله ده چې پنځوس کاله نوره هم استعمالېداى شي، ځکه امريکا ته کرزي او اشرف غني په افغانستان کې د پنځوسو کالو لپاره نظامي اډې ورکړې دي او د شپاړس ساعته جګړې ماموريت پنځوسو کالو ته هم اوږدېداى شي.
