مونږ حکومت او حاکميت د پاک قران غواړو

شعر: اروا ښاد شهيد محمد موسی ” شفيق “

لکه نسيم د باغ ګلونو ته پيغام دی زمونږ

هدف د کار او د خدمت ، وطن او قام دی زمونږ

مونږه افغان ته يو قوي ملي وحدت جوړوو

د تفرقي ، د أمتياز په کور قيامت جوړوو

وراني ويجاړې د وطن په خپل همت جوړوو

عدل او انصاف ، او مساوات ، روح د نظام دی زمونږ

مونږه په دين ، په مليت باندي خپل سر ورکوو

د جفا غشو له ، سنګر غوندي ټټر ورکوو

واړه افغان ته د نهضت نوي خبر ورکوو

عقيده پاکه ، پاک ايمان په پاک اسلام دی زمونږ

مونږه تعميم د معارف په خپل وطن کي غواړو

نوی أهنګ د نوي ژوند ، په خپل چمن کي غواړو

دشمن د حق او حريت ، سر په کفن کي غواړو

خدمت د قام ته چې ولاړ وي ، پرې سلام دی زمونږ

وطن نه ، بد بد رواجونه رسومات ورکوو

رنځونه ، ولږي ، بي علمي او خرافات ورکوو

د کار د منځ منځ نه ، بيځايه سکنات ورکوو

بناٌ پر حُسنِ اعتماد باندي ، مرام دی زمونږ

ظلم ، رشوت ، تملق ، دروغ او خيانت نه منو

غواړو په زړه کښي درد او رحم ، قساوت نه منو

سره همدرد يو ، بي دردي په رسميت نه منو

ملأ ، عالم ، مخلص ، خادم ته أحترام دی زمونږ

مونږ په اسيا کې  يو مسعود افغانستان غواړو

مونږ حکومت او حاکميت د پاک قران غواړو

أباد پر صلح و أمنيت باندي جهان غواړو

ټينګ د سنجش ، فکر و تدبير په لاس زمام دی زمونږ

ملي مفاد په شخصياتو ، مقدم دي مونږ ته

حُکم د دين – عالم او مشر ، محترم دي مونږ ته

دفع د ظلم په بل ظلم ، هم ستم دي مونږ ته

د قوم خادم چې وي ، هغه ځلمي أمام دی زمونږ