د چین د څېره پېژندونکې ټیکنالوجۍ په مرسته رواني ناروغ یو کال وروسته له خپلې کورنۍ سره یوځای شو.
د څېرې پېژندونکې ټیکنالوجي په مرسته پیدا شوی ۳۱ کلن کس، چې رواني ناروغي یې درلوده، د تېر ۲۰۱۷ز کال د جنوري په میاشت کې، چارواکو د چانګکوینګ ښار د اورګاډي په تمځای کې په ګډوډ حالت کې وموند. کله چې پولیسو پوښتنه ترې وکړه چې کور دې چېرته دی، ده به په تت اواز یوازې ”پیسې – پیسې“ ورته ویل. پولیسو روغتون ته ولېږه.
تر یوه کال پورې په روغتون کې تر درملنې لاندې و. په درملنې سره یې حالت د پخوا په پرتله لږ ښه شو، خو بیا هم نه پوهېده چې له کومه راغلی دی.
له دې وروسته د نوموړي روغتیاپالانو د څېره پېژندونکې ټیکنالوجۍ له یوه شرکته مرسته وغوښته او د هغه یو انځور یې ورته ولېږه.
د ځیرکو کېمرو په عامو ریکارډونو کې تر پلټلو او کتلو وروسته د نوموړي څېره، له همدې ځایه سلګونه میله لیرې د سیچوان ولایت د ”لیانګشن یي“ کلي له یوه اوسېدونکي سره جوړه شوه.
د ساوت چاینا مارنینګ پوسټ د رپورټ له مخې، یاد کس، چې نوم یې نه دی ښودل شوی، وروسته خپلې سیمې ته ولېږل شو او له خپل ورور سره یوځای شو.
چین او څېره پېژندونکې ټیکنالوجي
څېره پېژندونکې ټیکنالوجي د څېرې د ځانګړنو له تشخیصولو وروسته پایلې د پېژندنې او شخصي معلوماتو له ډېټابېس سره پرتله کوي، او په همدې ډول د څېرې له مخې د یو کس په اړه معلومات ترلاسه کوي.
چین په وروستیو کلونو کې د څېره پېژندونکې ټیکنالوجۍ په ډګر کې زیات پرمختګ کړی دی او په بېلابېلو ډګرونو کې کار ترې اخیستل کېږي.
تېره اونۍ هم د همدې ټیکنالوجۍ په مرسته پولیس وتوانېدل چې د پنځوس زره کسانو په منځ کې تورن کس وپېژني او ویې نیسي.
دمګړۍ چین کې ۱۷۰ میلیونه ځیرکې کمرې په عمومي ځایونو کې لګول شوې دي. چین ویلي چې دا شمېر به په راتلونکو دریو کلونو کې څلورو میلیونو ته ورسېږي.
