(کابل ټکی کام، ۱۳۹۷، غوایی ۱) د افغانستان کرکټ بورډ وايي، د ملي لوبډلې د راتلونکو سياليو په موخه يې په هند کې يو روزنيز کمپ پرانيستی چې د ملي لوبډلې لوبغاړي او د نوولس کلنو او کورني کرکټ ۴۳ لوبغاړي به پکې تمرينونه وکړي.
کرکټ بورډ وايي، په دې کمپ کې به د د افغانستان مشر کوچ او د توپ اچونې او توپ نیونې روزونکي دغه لوبغاړي روزي او ځيري به یې او بیا به پریکړه کوي چې کوم شمیر نوي لوبغاړي د ملي لوبډلې برخه وګرځوي.
خبرپاڼه کې د هغو ۲۲ لوبغاړو نومونه ذکر شوي چې هند ته په لومړي پرواز کې لېږدول شوي دي.
چې په ډله کې يې، وفادار، یوسف ځاځی، نوین الحق، عظمت الله عمرزی، سید شیرزاد، یمین احمدزی، نجات مسعود، نواز خان، درویش رسولي، یونس احمدزی، حشمت الله شهیدي، رحمان الله ګربز، شاهد مندوزی، بهیر شاه محبوب، اکرام علي خیل، ضیا الرحمن، وقار سلام خیل، قیس احمد، فضل الحق، محمد شهزاد، ضیا الحق او رحمت الله سهاک نومونه شامل دي.
شهزاد محمدي چې له لومړي پرواز څخه پاتې شوی ښايي نن يا سبا هند ته ولېږدول شوي.
په دويمه ډله کې چې تر اوسه د هند روزنيز کمپ ته نه دي رسېدلي خو کرکټ بورډ وايي د اپريل په اته ويشتمه نيټه به هند ته لېږدول کېږي افتاب عالم، فرید ملک، دولت ځدران، احسان الله جنت، جاوید احمدي، ناصر جمال، افسر ځاځی، اصغر ستانکزی، شرف الدین اشرف، امیر حمزه، رحمت شاه، نجیب الله ځدران، نجیب ترکی، عثمان غني، حضرت الله ځاځی او نور علي ځدران دی چې د هند په روزنيز کمپ کې به ګډون وکړي.
د کرکټ بورډ د معلوماتو له مخې، د دې تمريناتي کمپ په درېيمه ډله کې کریم جنت، شفيق الله شفق، شاپور ځدران، ګلبدين نایب او سمیع الله شنواري دي چې د راتلونکې می مياشتې په دولسمه نيټه به هند ته ځي.
د کرکټ بورډ د مطبوعاتي څانګې مشر لطف الله ستانکزی وايي، له دې لوبغاړو به د بنګله دېش او هند سره د پنځه ورځنيو دوستانه لوبو لپاره هم لوبغاړي غوره کېږي.
