راپور تاژ : فرید افغان
په هیواد کې وروستیو بریدونو جنګ جګړو نړیوال او افغان حکومت د وارخطایي سره مخ کړي او د طالبانو خوځنده عملیاتو او د داعش سیستماتیکو پلان شویو بریدونو په لویه کچه اندیښنې راپارولې.
داعش تر ډیره هڅه کوي د کابل لویدیځ چې هزاره یا شیعه وګړي په کې میشت په نښه او د عراق په څیر دلته هم د سني او شیعه تر منځ تفرقه اچوونکې هڅې ترسره کړي.
طالبان بیا دا کوښښ کوي ترڅو هر هغه ځای په نښه کړي چې حکومت او نړیوالو ته په کې دروند زیان او تریخ پیغام ورکړي چې تر ډیره په دې پالیسۍ کې بریالي هم دي.
پر خبریالانو د داعش ډلې وروستی برید د دې لامل شو چې حکومت د تیرې ورځې د بریدونو د تلفاتو کره شمیرې پټې او هغه څه اعلان کړي چې خوښه یې وي.
تیره ورځ طالبانو او داعش ډلې په همهاله توګه پر لسمه او دیارلسمه امنیتي حوزو بریدونه وکړل بریدونو که څه هم تلغات درلودل خو هغه شمیرې چې واقعیت یې درلوده رسنیو ته په واک کې ورنه کړل شوې.
طالبانو پر لسمې حوزې د لوی برید مسؤلیت منلی او هغه یې د کندوز د بوږنونکې پیښې چې ولسي وګړو ته په کې د سر دروند زیان واوښت، غچ بللی.
د یونما د راپور سره سم په هغه برید کې چې افغان ځواکونو د دکندوز په دشت ارچي کې د دستار بندۍ په یوه غونډه ترسره کړ ۱۰۷ تنه ولسي کسان مړه اوټپیان کړي و چې ۸۰ تنه یې یواځې ماشومان و.
طالبانو ویلي چې د کابل لسمه امنیتي حوزه کې یې د استخباراتو مهم مرکز په نښه کړی او په خبره یې چې “ له دغه مرکز څخه د کابل اداره او ځينې بهرنیو استخباراتي کړۍ په ګډه کار اخلي، دلته د بمبارونو پلانونه جوړیږي او له همدې ځای څخه د هیواد په لر او بر کې هره ورځ ولسي کورونه، مدارس، مساجد او کلینیکونه بمباروي، د ښځو او ماشومانو په ګډون ګڼ شمیر هیواد وال د غم په ټغر کښینوي. “
د طالبانو خبرپاڼه زیاتوي؛ ملګرو یې په شپږنیم ساعته جګړه کې د دغو مراکزو دننه له شلو ډير بهرني او کورني استخباراتي لوړ پوړي افسران او کارمندان ووژل، لسګونه تنه يې ټپيان کړل، همدا راز يې په څيرمه نورو اهدافو کې هم ګڼ شمیر دښمنان مړه او ژوبل کړل چې د دوی په وینا، فریادونه يې بهر اوریدل کیدل.
تر دې ور آخوا طالبانو د غویي پر ۱۴ د بدخشان د کوهستان ولسوالۍ او ورڅیرمه سیمې ونیولې او تر څنګ یې د یو شمیر نورو ولسوالیو ځینې سیمې ونیولې چې په ولسي جرګه کې د دې ولایت استازې فوزیه کوفي د سلو عسکرو د وژل کیدو خبر ورکړ .
د غویي پر ۱۸ د تاله برفک ولسوالۍ سقوط وکړ چې د بغلان د ولایتي شورا د رئیس په وینا طالبانو ۱۵ عرادې ټانګونه او رینجر له ګڼو مهماتو او ۳۰ امنیتي ځواکونو سره یوځای نیولي.
هغه څه چې د دفاع وزارت ویاند محمد رادمنش له څو ورځو وروسته لا هم د یادې ولسوالۍ سقوط نه مني او زیاتوي چې ځواکونه یې لا هم په سیمه کې فعال دي.
د غویي پر ۱۸ ماښام مهال د فاریاب ولایت د بلچراغ ولسوالۍ هم سقوط وکړ چې طالبانو د څو رینجرو او ټانګونو په ګډون ګڼ مهمات یووړل.
دا ولسوالۍ هغه مهال له سقوط سره مخ شوه کله چې طالبانو په سیمه کې د جمعیت اسلامي د نوموتي قوماندان دادالله(دادي) اړوند د کولیان او تغلیمس ستراتیژیکې سیمې ونیولې او نوموړی یې له سلګونو ځواکونو سره یوځای د سیمې پریښودو ته اړ کړ.
خو څو ورځې وروسته د کوهستان او پلچراغ د بیرته نیولو ادعا دولتي ځواکونو وکړه او د طالبانو سرچینو هم ومنله چې د ولسوالۍ له مرکز څخه یې تکتیکي شاتګ کړی دی.
د فاریاب ولایت په بلچراغ ولسوالۍ کې د طالبانو مطبوعاتي مسئول لږه شېبه وړاندې رسنیو ته ویلي، چې د قومي مشرانو او دیني عالمانو په غوښتنه یې د ملکي تلفاتو د مخنیوي په خاطر د بلچراغ ولسوالۍ مرکز او بازار څخه عقب نشیني کړې؛ خو زیاتوي چې لاهم د ولسوالۍ د مکتب په شمول شاوخوا حاکمو نقطو کې یې سنګرونه نیولي او دمناسبې موقع په ترلاسه کولو به بیرته د ولسوالۍ مرکز ونیسي.
دا بریدونه داسې مهال ترسره کیږي چې افغانستان ته تازه دمي امریکایي عسکر هم ځینې رسیدلي او یو شمیر نور پر لاره دي.
بل پلو د غزني او پکتیکا ترمنځ لویه لاره د اوومې ورځې لپاره هم د د دولتي ځواکونو پرمخ بنده ده.
ولسي خلکو ته پر نورو فروعي لارو د تګ اجازه ورکړل شوې او د لارې دخلاصون لپاره دولتي ځواکونه خپل ټول زور وهی خو لا هم کومه نتیجه نه لري.
امریکایي او افغان ځواکونو د طالبانو روان عملیات پاروونکي بللي او زیاته کړې یې ده چې طالبان په دې توګه غواړي د سولې شوی وړاندیز رد او د نړیوالو ځواکونو په مشرۍ افغان حکومت ته ستونزې جوړې کړې چې یواځې د تیرې اونۍ په ترڅ کې یې د هغوی سلګونو سرتیرو ته مرګ ژوبله اړولې .
