برنارډ لویس د سیکولرانو پیر

لیک: نعمان منلی

برنارډ لویس په ۱۰۱ کلنۍ کې څو ورځې مخکي ومړ، نوموړی له اصله یهودی و او د برتانیه او امریکا دواړو تابعیت یې لاره. ده اسلامي تاریخ کې دکتورا لرله، په ځانګړې توګه د عثماني تاریخ تکړه ماهر و او غرب کې د اسلام مفسر! بلل کیدی.

برنارډ لویس تر ټولو مشهور او وتلی مستشرق و، په مړینه یې عرب او غیر عرب سیکولرانو اوښکې تویه کړې، هغه یې زیات وستايه او د هغه په علم او پوهه یې پریمانه مقالې ولیکلې. راځئ نوموړی مستشرق وپېژنو چې هغه د مسلمانانو او اسلامي نړۍ په اړه څه نظر لاره. په دې اړه له یوه خبري اژانس سره د ده خبرې رااخلم.

برنارډ لویس په 20/5/2005 کې یوه خبري اژانس ته د مسلمانانو په اړه وویل: عرب او مسلمانان فاسد، بېلاري او ګډوډي خوښوونکي خلک دي، دوی هیڅکله متمدن کیدای نه شي او که همداسې پریښودل شي د نړۍ ټول تمدنونه به پخپلو تروریستي کړنو متضرر کړي.

نو د مسلمانانو له شره د ځان ژغورلو لپاره ښه لاره دا ده چې هغوی باید بیرته اشغال او هیوادونه یې مستعمره کړل شي. د دوی دیني او ټولنیز ثقافت باید ختم شي، څرنګه چې امریکا فعلا په دې کار بوخته ده باید د برتانیه او فرانس له زړو تجربو ګټې واخلي. او دې دوو هیوادونو چې د دې سیمو استعمار کې کومې غلطۍ کړې وې له هغه باید ځان وساتي.

د عربو او مسلمانو هیوادونو باید په کوچنیو ټوټو او طايفو وویشل شي، په دې لړ کې باید د هغو نارو او سورو ته ونه کتل شي، په هغوی باید رحم ونه کړل شي، هغوی مخکي له دې چې زموږ تمدن ته ضرر رسوي باید ختم او د دوی فاسد دیني او ټولنیز عقاید له منځه یوړل شي.

دې سپک مستشرق او ختیځپوه له دې هم خوړین او له فتنو ډک افکار لرل او د مسلمانانو سرسخته دښمن و. خو زموږ د اسلامي نړۍ سیکولر مخلوق هغه خپل لارښود او پیر باله او د هغه په مړینه یې مرثیې لیکلې! نو له دې هلاک شوي استاده یې شاګردان هم وپېژنئ.