ليکوال : احمد منصور
څو مياشتې دمخه نيکولسن په يوه مطبوعاتي غونډه کې وويل چې سږکال به په طالبانو د نظامي فشار ترڅنګ مذهبي فشارونه هم ﺯيات کړو، او ﺯياته يې کړه: طالبان به دې ته مجبور کړو چې له افغان حکومت سره سوله وکړي.
خلک حېران وه چې مذهبي فشارونه به په څه ډول وي؟
کله چې مزدور حکومت په پرلپسې ډول د علماؤ د راغونډولو خبرونه ورکول، او بيا دا لړۍ په جاکرتا کې د درېوو هيوادونو دعلماؤ په نوم په غونډه پیل شوه، ورپسې په کابل کې د تېر رمضان المبارک په مياشت کې د حکومتي ملايانو غونډه جوړه شوه. نو اولس پوه شو چې له مذهبي فشارو څخه د نيکولسن هدف د درباري ملايانو دا ډول غونډې دي.
حکومت او امريکايان دغو دواړو کنفرانسونو ته خوشبينه ول او په دې آند ول چې کېداى شي طالبان دغو د علماوو د کنفرانسو په احترام له مبارﺯې لاس واخلي خو داسې ونه شول بلکې برعکس دغه کنفرانسونه د طالبانو په ګټه تمام شول او خپله مبارﺯه يې نوره هم ګړندۍ کړه.
په دې هر څوک پوهېږي چې ورته غونډې چې دايرېږي او روانه مبارﺯه تر پوښتنې لاندې راوستل غواړي، مستقيماً د امريکا له خوا اداره او څارل کېږي او د امريکا د استخباراتي ډرامو له برخې څخه وي، امريکا په افغانستان کې د شکست پړاو ته نېږدې شوې ده، اوس په داسې غونډو جوړولو سره غواړي نړيوالو ته وښايي چې مونږ دلته بيا رغونې او د افغانانو ترمنځ روغې جوړې ته راغلي يو او په افغانستان کې روانه جګړه د اشغال په وړاندې نه، بلکې د افغانانو خپلمنځي جګړه ده.
حقيقت خو دا دى چې امريکايان يرغلګر دي ﺯمونږ خاوره يې اشغال کړې، دلته يې د خپل دايمي حضور لپاره يو شمېر دسيسې په کار اچولي، چې د بېلګې په ډول يې د ورستيو ډرامه ډوله استخبارتي هڅو يادونه کولی شي.
امريکايي جنرال نيکولسن چې له څه مودې راهيسې د ځينو ډرامو په جوړولو بوخت دی، د پرلتونو په نوم ډرامې ترڅنګ يې اوس «د علماؤ غونډې» په نوم د بلې روانې ډرامې دوه برخې نشر ته سپارل شوي، لومړى برخه يې په جاکرتا کې د درې هيوادو د علماوو کنفرانس وه او دويمه برخه يې په کابل کې د درباري علماوو غونډه وه،
د دغې ډرامې درېمه برخه هم نشر ته چمتو ده چې هغه د سعودي په جدې ښار کې د روانې مياشتې په يوولسمه او دولسمه د (٣٧) هيوادونو د علماوو کنفرانس جوړېدل دي.
عجيبه خو لا دا ده چې د طالبانو د مبارﺯې ضد فتوا له علماوو غواړي حال دا چې دغه وربلل شوي علماء په هغه کتاب د طالبانو د مبارﺯې د نامشروعيت لپاره دليل راوړي په کوم کتاب چې طالبان خپله مبارﺯه جهاد ثابتوي.
طالبان د خپلې مبارﺯې د مشروعيت لپاره نه يوازې په قرآن کريم او احاديثو کې کافي دلايل لري، بلکې د اجماع، قياس، عقلي او نقلي دلايلو په رڼا کې خپله مبارزه په وضاحت سره مشروعه او سپېڅلې ثابتوي.
د پورتنيو حقايقو په اساس ويلى شو چې د طالبانو روانه مبارﺯه بر حقه ده او د جواﺯ لپاره يې بې شماره دلايل شتون لري که په سعودي يا بل ځاى کې د دغې مبارﺯې د غير جواﺯ فتوا ورکول کېږي دا د امريکا له دسايسو څخه يوه دسيسه او د نيکولسن د ډرامو له برخې څخه يوه برخه ده ځکه هلته راغونډېدونکي علماء د نن عصر د مقدس جهاد د نامشروعيت فتوا ورکوي، هغه هم د دوه ورځو په ترڅ کې، حال دا چې دغه فتوا ورکول خو کم ترکمه اونۍ يا دوه اونۍ خو نيسي ځکه که وګورو سم نيم قرآن کريم د جهاد له اوامرو او فضايلو ډک دى،
مزدور حکومت او امريکايان دې بې ځايه ځانونه نه په عذابوي او نه دې په دغه ډرامه دومره مصارف کوي ځکه دغه ډرامه به يې د مخکېنيو ډرامو په څېر بې ګټې تمامه شي او مصارف به يې ټول خوشې لاړ شي.
