تبصره
د امریکا جمهور رییس تېره ورځ په خپله وینا کې پر پوتین او مودي ملنډې وهلې دي. ډونلډ ټرمپ ویلي چې د افغانستان جګړې پخوانی شوروي اتحاد په مسکو بدل کړل، او مودي ته یې ویلي په کابل کې دې کتابتون جوړ کړی، خو دا نه ده څرګنده چې څوک ورځي او که نه.
خو ټرمپ په همدې مهال پر افغانستان د شوروي اتحاد د یرغل غیرمستقیم ملاتړ کړی او ویلي یې دي چې شوروي اتحاد له خپلو سیمو د ”ترهګرو“ د لیرې ساتلو لپاره پر افغانستان برید کړی و. د نوموړي دې څرګندونو کابل حکومت هم سره کښېکاږلی او په یوه اعلامیه کې یې ویلي چې له ډيپلوماټیکو لارو یې له امریکايي لوري د دې څرګندونو په اړه توضیحات غوښتي دي.
ټرمپ په خپلو خبرو کې د هند په لومړي وزیر، نریندرا مودي، هم ملنډې وهلې دي. نوموړي وویل، مودي بار بار راته ویل چې په افغانستان کې مې یو کتابتون جوړ کړی… نه پوهېږم چې په افغانستان کې به څوک دا کتابتون استعمالوي.
ډونلډ ټرمپ په خپلو څرګندونو کې په افغانستان کې د شوروي اتحاد شرمناک شکست ته اشاره وکړه، خو خپل برخلیک یې هېر و. پخواني شوروي اتحاد چې په نړۍ کې کوم اثر، برم او زور درلود، د افغانستان د جهاد له برکته یې هر څه له صفر سره ضرب شول.
هر هېواد خپل خپل تاریخ لري. امریکا پر نورو هېوادونو د تېري او بیا د شرمېدلې ماتې تاریخ لري، او افغانستان د یرغلګرو په مقابل د مقاومت تاریخ لري، چې ټول یرغلګر یې څه په ګور کړي او څه یې تر کوره ځغلولي دي.
امریکا به هم، که خدای کول، تر کوره ځغلوي. نن خو ټرمپ پوتین ته له شوروي څخه د مسکو په بدلون پیغور ورکوي، بیا به پوتین ټرمپ ته له متحده ایالاتو څخه په واشنګټن د بدلېدو پیغور ورکوي او ملنډې به پرې وهي.
پر افغانستان یرغل او روانې جګړې امریکا دې حالت ته رسولې چې پخوانی شوروي اتحاد خو سل کاله پس بیا مسکو شو، که خدای کول، امریکا به ۳۰۰ کاله وروسته شا ته ځي. په ۱۷۹۷ز کې چې کوم واشنګټن ؤ، بیا به هغه واشنګټن شي. بیا به امریکایان د جورج واشنګټن او جان ډامس په یادونو شمعې بلوي، ځکه امریکا د اقتصاد له پلوه د ګړنګ پر سرولاړه ده او ورځ په ورځ یې اقتصادي حالات مخ په ځوړ روان دی.
په امریکا کې دننه سیاسي حالت هم تر بل هر وخت مخ په خرابېدو دی. د امریکا د پخواني جمهور رییس جورج ډبلیو بش د حکومت د چارواکو د معلوماتو په اساس، ښايي ټرمپ د حکومت ټاکلې موده پوره نه کړي، ځکه امریکا یې په یوه بد لوري روانه کړې ده او ټرمپ به تر وخت دمخه استعفا وکړي.
د جورج ډبلیو بش مشاور، اسټنبرګ جي آلن، ویلي، امکان لري د ۲۰۱۹ز تر پای پورې ټرمپ استعفا وکړي، ځکه د ده په حکومت کې دوست نه دی ورپاتې، هغه څوک چې ورته باوري ښکارېدل هغوی هم استعفاوې وکړي او ځانله یې پرېښود.
د افغانستان جګړه به دوه کاره کوي: یو به ټرمپ استعفا ته اړکوي او بل به متحده ایالات په واشنګټن بدلوي. د ټرمپ له ناامیدیو داسې بریښي چې متحده ایالات به په واشنګټن بدل شي، ان شاءالله.
