کریم الله زاهد
شاوخوا ۱۷ کاله وړاندې امریکا د خپلو حلیفانو سره یو ځای د هیواد پر مسلمانې خاورې وحشي یرغل راوړ او د افغان ولس ټول مشروع حقوق یې تر پښو لاندي کړل.
دې اشغال نه یوازې دا چې د هیواد خاوره او اراضي وګواښله، بلکې د افغانانو د ژوند ټول دیني، اقتصادي، اجتماعي او تعلیمي اړخونه یې تر ګوزار لاندې راویستل.
خو دا چې افغانان یې په وړاندې په پوره متانت او زړوتیا سره وجنګېدل او ۱۷ کاله د جهاد په اوږدولو یې امریکا په پوځي او اقتصادي لحاظ د ماتې تر پولې ورسوله، ځکه خو اوس د سولې کچکول ګرځوي او له طالبانو سره د افغان مقاومت د نماینده په حیث مسلسلې غونډې کوي.
له بله پلو ددوی تالي څټي چې د امریکا اشغال ورته حیاتي ارزښت لري په وار وار همدا خبره تکراروي چې امریکا باید په افغانستان کې ۱۷ کلنې لاسته راوړنې په اوبو لاهو نه کړي.
سوال دا دی هغه کومې لاسته راوړنې دي چې دوی یې پر ضیاع ویریږي او له امریکا یې د ساتنې غوښتنه کوي؟
ځواب واضح دی، امریکا تر خپل اشغال وروسته په نړۍ کې یوازنی اسلامي نظام له مینځه یووړ او پر ځای یې د ډیمکراسۍ، غربي قوانینو او بشري حقوقو پر بنسټ ولاړ نظام رامنځته کړ.
دې نظام نه یوازې دا چې د دین او سیاست د بیلتون پالیسي پر مخ یووړه، بلکې د اسلام دین خصوصا سیاسي جوړښت یې نوي نسل ته د بېرته پاتې والي، ارتجاعیت او د جبر، ظلم او بربریت په حیث معرفي کړ.
د هیواد ټول حکومتي نظام یې د ډیمکراسۍ او سیکولرزم پر اساساتو ودراوه، ورسره یې د اداري فساد لمن دومره پراخه کړه چې یوه اداره ترې خلاصه نه وه او افغانستان یې په ځلونو د نړۍ لومړی فاسد نظام کړ.
د نشه يي توکو لوی قاچاق د همدې فاسد رژیم د قومندانانو او وزیرانو لخوا کیده چې له امله یې په میلیونونو افغان ځوانان په نشه یې توکو روږدي شول.
په معنوي برخه کې یې د افغانانو د دیني او اجتماعي ارزښتونو بې دریغه اهانت او بې حرمتي وکړه. په ښکاره یې د قرانکریم نسخو ته اور واچاوه، د سپي پر تصویر یې د توحید پاکه کلمه رسم کړه، په هیواد کې یې بې شمیره کلیساوې او تبشیري مراکز فعاله کړل او د عبدالرحمن پنچشیري په څېر د علني مرتدانو ښکاره دفاع یې وکړه.
ځوانان یې له علیا مقاصدو څنډې ته کړل او هغوی یې د لهو، لعب او لایعني کارونو داسې ډنډ ته ور ټېل وهل چې جبیره کول به یې کلونه کلونه وخت ونیسي.
نور بيا….
