انجنیر عمیر ویاړ
د تیرو څلویښتونو کلونو په انقلابي شرایطو کې مو ډول ډول نادودې ولیدې، واوریدې او حس مو کړې، خو بالآخره مو داسې یوه نادوده واوریده چې په د افغانستان په ټول تاریخ کې به ساری نه لري.
دا داسې نادوده چې هغه د پښتو متل په مصداق ځینې خلک ځان شرموي خو ځینې نور بیا جهان شرموي.
لوستونکو ته به یاد وي چې نږدې میاشت یوه نیمه مخکې بلا استثنا په ټولو رسنیو کې د ارګ لخوا د خالد په نوم عملیات اعلان شول، چې ډیری چارواکو چې د همدې کرغیړن حکومت شیدې څښي د دې اعلان هرکلی وکړ، آن خارجي دوستانو یې هم په ډیر کبر او غرور سره بدرګه کړ.
ولسمشر غني چې نږدې ۴۰٪ به لیونی وی او هغه داسې چې تل په ګډوډو سر وي، کله لمونځ غلطوی، کله دعا کولو کې لاسونه غوږونو ته وړي کله د پیغمبر لمسي ته د خدای لمسی وایي، هم د خالد عملیاتو پر تطبیق شخوند وواهه او ښه په زور او زور یې تکرار کړ.
خو دا چې اوس طالبانو هم د الفتح په نوم عملیات اعلان کړل، نو له خارجي چارواکو چې د نن سبا د افغانستان اصلي واکداران دي نیولې آن تر غلامو چارواکو پورې ټولو د طالبانو دا اعلان وغانده، طالبانو د دوی د غندلو په ځواب کې وویل چې لاسپوڅي دولت هم ورته اعلان تر دوی مخکې کړی، او ټولو رسنیو هم د حیرانتیا په نړۍ کې غږ پورته کړ چې د خالد عملیاتو اعلان خو حکومت هم کړی، نو ولې د حکومت د جنګ اعلان ستایل کیږي او د طالبانو اعلان غندل کیږي؟
دې خبرو اشرف غني وارخطا کړ، سملاسي یې اعلان وکړ چې دوی هیڅکله هم د خالد په نوم عملیات ندی اعلان کړي؟
د اشرف غني په دې څرګندونو یواځې افغانان نه بلکې ټوله نړۍ هک حیرانه او ګوته په غاښ کړه.
ځکه چې جمهوری ریاست د یوه هیواد مغز وي، او چې مغز دومره پوچ وي چې یوه ورځ اعلان کوي او بله ورځ ترې منکريږي نو دې ته څه ډول پرتوګ وشي.
افسوس دې چې په ارګ کې ناستو چارواکو د کوچنیو ماشومانو خصلت خپل کړی، او پر یوه ستر او لرغوني ملت د لوبو تکل کوي.
دې کې شک نشته چې ارګ هم د حال پر ژبه پرې تو لعنت وایي.
د ارګ په دې کړنې سره ټول ارګ بلکې ټول افغانان وشرمول نه دا چې یواځې ځان یې وشرماوه.
نو یو ځان شرموي بل قام شرموي
