دوستم ولې خفه شوی دی، د پردې تر شا څه تېریږي؟

کابل ټکی کام (سه شنبه ۲۲ مرغومي ۱۳۹۴ ل) عبدالله هاشمي
د دولتي چارواکو له خولې!
د جمهور رئيس لمړۍ معاون جنرال دوستم نه تر سترګو کیږي. هغه نه د کابینې په جلسو کې ښکاري او نه د امنیت په شورا کې مخې ته راځې او نه هم له جمهور رئيس سره یوځای لیدل کيږي. په مطبوعاتو کې هم د ماشومانو د شیطان چراغ غوندې مړ (ګل) دی. داسې ښکاري چې د جنرال دوستم (چې په نړی کې تر ټولو بې سواده لوړپوړۍ چارواکۍ دی) او د ع غ ترمنځ د اختلافاتو کچه ډېره لوړه شوې ده.
د دوستم غیابت هغه وخت رسنیز شو چې نوموړۍ په سترو غونډو کې نه شو تر سترګو، خصوصاً هغه درې سترې ودانۍ چې پرانستنه یې کېدله دوستم پکې حضور نه درلود. کله چې د پارلمان نوې ودانۍ د لوړپوړو حکومتي چارواکو له لوري پرانستل شوه، د جمهور رئیس لمړۍ مرستیال چې د راتلو تمه یې کېده، همداسې غیب وو. همدارنګه (دا بې سواده، او بې واکه) لمړۍ مرستیال د دوه نورو ودانیو په پرانست غونډو کې، چې د وزارت دفاع او د کورنیو چارو وزارت ودانۍ جوړې شوې، هم تر سترګو نشو.
د ټاپي پروژې د رسماً لاسلیک کولو سره سمدلاسه، دولت ددې لپاره ډېر تبلیغات په کار واچول مثلاً مشاعرې او غونډې یې جوړې کړې چې پدې کې هم لوړ پوړو چارواکو ګډون کاوه خو د دوستم غریب جوسه بیا هم پکې نه ښکاریده.
کله چې د افغانستان د کرکټ ملي لوبډله له یوې سترې بریا سره خپل ملک ته راوګرځېدله، نو لوړپوړو چارواکو يې دروند هرکلۍ وکړ خو هلته هم دوستم نه شو ښکاره، (دوستم بې چاره).
ویل کېږي چې دا کیسه هغه وخت منځ ته راغله کله چې جنرال دوستم شمال ته د طالبانو د ځپلو لپاره ولاړ او هلته یې ناروا ظلمونه ترسره کړل، کله چې دی بېرته کابل ته راستون شو نو ولسمشر خپلې ماڼۍ ته راوغوښت، خو هغه ورسره ونه منله او ورته یې وویل چې ولسمشر دې دفتر ته ورشي او دده احوال پرسي دې وکړي، بیا هغه وو چې دا خبره پاتې شوه. درې ورځې وروسته جنرال دوستم د غني دفتر ته ورغۍ او هلته د دواړو ترمنځ شخړه رامنځ ته شوه، نږدې وه چې دوستم په غني راباندې کړي خو هلته موجود امریکايي چارواکي ته دې (بې خیري) وي ځينې خلاص کړ او دوستم یې وګواښه چې داسې کار ځينې ونشي ګڼي ورته ښه به نه وي.
شخړه په څه رامنځ ته شوه؟
دوستم غوښتل چې یو ځل بیا په شمال کې خپله ملېشه رامنځ ته کړي خو امریکايي ځواکونو یې د اعاشې ذمه په غاړه نه اخیسته او نه هم د بې چاره غني کمزوري دولت ددې صلاحیت درلود چې داسې کار دې وکړای شي، ځکه هلته یو بل ښامار عطا محمد نور، چې ډاکټر (شوقي) عبدالله عبدالله یې په کابل کې په دنده ګمارلۍ دی، پروت دی، هغه دوستم په شمال کې نشي زغملای ځکه چې هلته به غلاوې د دواړو ترمنځ نیمې شي.
دوستم غریب چې څه دپاسه ۴۰۰ ساتونکي لري او تر پنځوس موټرو پورې له ده سره د امنیت په خاطر ګرځي، هره میاشت تقریباً درې سوه لکه افغانۍ مصارف لري، هم بې چاره دولت یې نشي پوره کولای، نو ځکه هم اقتصاد پوه غني له هغه وغوښتل چې امنیت به یې د کورنیو چارو وزارت په غاړه واخلي او دی دې خپل ساتونکي رخصت کړي چې پدې سره دوستم دومره خفه شوی دی چې غني ته یې په تلفون سختې ښکنځلې کړي دي، د بعضو چارواکو په خوله چې هغه یې په مرګ هم ګواښلۍ دی.
له دې وروسته دولت د دوستم د ساتونکو تنخوا او اعاشه بنده کړله او هغه ته یې څلوېښت دولتي پولیس منظور کړي دي چې ددې لوی… ساتنه به کوي، خو وارخطا دوستم په دولتي پولیسو څه باور لري، هسې نه چې پدې پولیسو کې د طالبانو نفوذي کس وي، بیا یې څوک ذمه وار دی.
د دوستم د خفګان بله وجه داده هغه غواړي چې دولت باید درې سره شي، د ع غ سره یو بل ع: عبدالرشید دوستم اضافه شي او د دفاع وزارت ته د ده ځوی معرفي شي، خو ع او غ یې چېرته مني، او نه غواړي چې یو بل سردرد هم پیدا کړي.
له دې سره سره اصلي اختلافات له هغه وخت څخه راشروع شوي دي کله چې دوستم له غني وغوښتل چې د دفاع او کورنیو چارو وزارت تر څنګ دې یو بل ارګان هم منځ ته راشي چې د لمړي مرستیال قطعه نوم دې ورکړي، او دا قطعه به یوازې د طالبانو په خلاف جګړه کوي، خو غني چې ځان ته تر بل هرچا ډېر هوښیار وايي؛ کله دا څویم ښکاره حماقت ته (او کې) ویلای شي.
د جنرال دوستم نږدي ملګرو دا ناپوه هغه وخت پوه کړ چې دولت پر هغوی اعاشې او تنخواګانې ودرولې، هغه یې پدې پوه کړ چې هېڅ صلاحیت ندی ورکړل شوی، او ورته یې وویل چې غني یوازې ځان درباندې ورسولو نور یې همداسې په ډاګ پرېښی یې، یوازې په سپورټي برخو کې یې هغه ته د اولمپيک ریاست په چوکاټ کې صلاحیت ورکړی دی، نو د پښتانه خبره دی دا صلاحیت اوس…که څه پرې وکړي. د پیسو او غلاوو چوکۍ ټولې عبدالله نیولي دي.
د حکومت په لمړي سر کې دوستم په ډېر شوق سره منډې ترړې وکړې، هرې سپورټي مقابلې ته به ناست وو، ځوانان به یې تشویق کول، توپونه به یې ورته اخیستل، چېرته به چې چاودنه وشوه، فلمي کامرو ته به یې ځان ورورساوه، همدارنګه د جنګ لمړۍ لیکو ته هم ولاړ چې له خپل دولت سره اوږه په اوږه ولاړ دی، خو چا تقدیر نکړ.
په لویه جرګه کې هم پرون د دوستم ملګرو یو اواز پورته کړ چې غني ته یې رایې ورکړي دي خو د هغه له لوري ورته هېڅ توجه نه کيږي او نه هم ددوی ګوند ته کوم صلاحیت ورکړل شوی دی.
ګورو چې نور به څه پيښيږي؟