تېره ورځ چې په کابل کې د سولې په اړه کومه څلور اړخيزه ناسته پېل شوې ، دولت يې د ښو پايلو هيله څرګندوي او وايي چې په هېواد کې د سولې د تامين لارې چارې به روښانه شي؛ خو پرخلاف يې پخپله لا د مخه د جګړې د دوام تبليغ پېل کړی . هغه داسې چې طالبان په څو برخو ويشي او وايي چې هغه طالبان ، چې سولې ته نه کيني پرضد به يې سخت پوځي ګامونه پورته شي.
ديادې ناستې ترلومړي پړاو وروسته چې په اسلام اباد کې ترسره شوه ، د بهرنیو چارو مرستيال وزيرخلیل کرزي وويل چې زمونږ د امنیت ځواکونه به په پوره شدت سره جګړه او موږ به د سولې چارې پرمخ وړو . دغه راز د افغانستان لپاره د امریکايي ځواکونو پخواني قومندان پيټرویس هم له خپلو امريکايي مشرانو غوښتي وو، چې په افغانستان کې دې هوايي بريدونه لا پسې زيات او زورورکړل شي.
دا په داسې حال کې چې له يوې خوا افغان دولت له امريکايي جګړه مارو سره د طالبانو پرضد جګړه پرمخ وړي او د ستونزي په اړخ کې واقع دی او ورسره دريم بهيروال پاکستان دی ، چې تل ورته د معامله ګر په سترګه کتل کېږي. او له بلې خوا د سولې نغارې غږوي او غواړي د افغان ولس سترګو ته خاورې ورشيندي. مګر که دذره عقل څښتن افغان هم لږ غور وکړي نو په دې باور به شي چې نه خو دافغان دولت سره د سولې اختیار شته او نه له پاکستان سره د طالب جنګياليو نمايندګي او نه پر طالبانو کنترول.
اصلا دا جګړه د امريکايانو او طالبانو ترمنځ روانه ده ، چې سوله او اوربند هم يوازې دوی پورې اړه لري. خو دا چې د طالبانو او امريکايانو ترمنځ به سوله څنګه او کله راشي؟ځواب يې ستونزمن دی.
ځکه چې له يوې خوا امريکايانو هېواد اشغال کړی ، ولسي وګړي يې د باروتو د لمبو خوراک او افغان ولس يې د امن او سوکالۍ پرځای د وير او ماتم په ټغر کېنولی .
که په دې ستونزمنو حالاتو کې ځينې مخلص هېوادونه د افغانستان د غميزې حل او د سولې هڅې پېل کړي ؛ نو بيا يې غربيان خنډ او د خپلو ګټو په پار زموږ د هېواد د برمرغيو کلونه اوږدوي.
بل لورې ته طالبان هم سخت او نه بدليدونکی دريځ لري او وايي، چې بهرنيان دي په غوڅه توګه له افغانستان څخه خپل پوځونه وباسي . که نه ، نو سوله او امنيت راوستل هيڅ امکان نه لري.
له دې دريځ څخه يې دا هم څرګندېږي چې طالبان دامريکايانو په وينا او پرتوقلونو هېڅ باور نلري، دبيا بيا چل او فريب کړنې تکراروي، د بېلګې په توګه :
امريکايانو دخپلې نوې پاليسۍ اعلان په لومړي سرکې ويلي وو، چې تر۲۰۱۴ز وروسته به د بهرنيو پوځونو جګړه ييز ماموريت په افغانستان کې پای ته ورسېږي او عسکر به يې هم ووځي.خو دادی عسکر يې په دايمي پټنځايونو کې خوندي کړل او د کندوز او هلمند په ولايتونو کې يې بيا پر جګړه ييز ماموريت لاس پورې کړ . نو که بهرنيان د سولې ترسپېڅلې نامې لاندې نور اهداف پوره کوي، هيڅ کله به دسولې څرک راښکاره نشي. او که له افغانستانه خپل پوځونه وباسي همغه ورځ سوله ده . بيا په اصطلاح څلور اړخيزو غونډوته هېڅ اړتيا نشته ؛ بلکې افغانان کولای شي ، چې خپله ستونزه په خپل کور کې حل کړي .
