سکروټې/ الياس فاتح
سکروټې
زخــم زخــم دې ښکـلا شوله اريـوبه
څـړيکه څـړيکه هره خـوا شوله اريـوبه
رنګينـۍ د شنـو درو لمبه لمبه شوې
د بـاروت بـاروت فضـا شوله اريـوبه
د وطن د مـور لمـن په وينو سره شـوه
هر کالـه کې ويـر غوغا شوله اريـوبه
د کتـار کتـار شهيــدو جنــازو تـه
پـه سلګيـو شپـه سبــا شوله اريوبـه
د بچيانو،ميندو غوښې وينې باد شوې
که شفـق شفـق دنيـا شوله اريـوبه
په دې تـوره تاريکـۍ د استبـداد کـې
مـړه د هيلــې دې ځـلا شوله اريـوبه
دغه وينې به د امـن سرې غوټـۍ شي
رب ته هيلــه په دعـا شوله اريـوبه
په ژړا به د زبېښاک نــړۍ نـړېـږي
پـه خنــدا مـې تـمـنا شوله اريـوبه
د فـاتح د رګـو وينـې شوې سکـروټې
د ستا غچ د خدای رضا شوله اريـوبه
يادونه: د اريوب ځاځيو ۲۰ ملکي شهيدانو په ياد، چې په يوه اوونۍ کې
د خارجي يرغلګرو پرلپسې درو هوايي بريدونو کې په شهادت ورسېدل
