کابل ټکی کام ۲۲وږی۱۳۹۴
تبصره: فرید احمد
د طالبانو د پخواني مشر ملا محمد عمر اخند مشر زوی مولوي محمد یعقوب په یوه غونډه کې وینا کړې، او د افغانستان اسلامي امارت مشرانو او کشرانو ته یې اطمنان ورکړی، چې پلار یې د ورپېښې ناروغۍ له امله له فاني دنیا څخه رحلت کړی دی.
مولوي محمد یعقوب هغه خبرې چې پلار یې د طالبانو د نورو مشرانو لخوا وژل شوی دی، د اسلام د دښمنانو پروپاګند بللی، او زیاته کړې یې ده چې پدې سره دښمنان غواړي د طالبانو په منځ کې اختلافات اېجاد کړي.
هغه وایي چې پلار ته يې د تور زیړي (هپيټایټس بي) او ټي بي(توبرکلوز) ناروغي ورپېښه شوې وه چې د سختېدو وروسته يې په کمه موده کې له منځه یووړ.
ده هغه کسان د اسلام دښمنان بللي چې د ملا محمد عمر اخند وفات د امارت د مشرانو یوه دسیسه بولي.
پدې وروستیو کې د بخت محمد په نامه یو کس چې ځان ته د منصور دادالله نوم اخلي، او اوس په زابل ولایت کې مېشت دی، تور لګوي چې ملا محمد عمر اخند د طالبانو د نوي مشر ملا اختر محمد منصور لخوا په یوه مرموز مرګ سره وژل شوی دی.
د یادونې وړ ده چې د طالبانو پخواني مشر ملا محمد عمر اخند په یوه لېږل شوي غږیږ پیغام کې بخت محمد (منصور دادالله) سخت رټلی، او د بخت محمد په اړه یې دا پېشګویي ورکړې چې نږدې ده هغه مرتد شي، او له امریکایانو سره یوځای شي. ملا محمد عمر اخند په خپل غږیږ پیغام کې په مشرانو غږ کوي چې بخت محمد (منصور دادالله) نور په امارت کې نه پرېږدي (که څه هم هغه توبه وباسي) دده په وینا هغه داسې جنایت کړی چې د بښلو ندی.
