« سرليکنه »
د دلوې شپږ ويشتمه له افغانستانه د روسانو دتيښتې ياشکست اوماتې ورځ ده، چې که د جدي ماښام مونږ تور ماښام يادوه ؛ نو ورسره ددلوې شپږ ويشتمه دافغانانو لپاره د روسانو په ماتې د خوښيو او د سرونو د قربانيو د وياړ ورځ يادولی شو .
څو کاله د کورني جګړو او سياسي بدلونونو له امله ددې ورځې يادونه پيکه معلوميده ؛خو د روان کال ددلوې د ورځې په مناسبت چې افغانانو د پيرنګ په څېر روسانو ته دخپل اسلاميت او افغانيت د سرښندنو او قربانيو زور وښود، په ځانګړو غونډو سره ونمانځل شوه .
د ملي يوالي حکومت دا غونډه په ارګ کې جوړه کړه چې دولتي لوړ پوړو چارواکو ترڅنګ زيات شمېر جهادي مشرانو ، قوماندانانو او پوهانو پکې برخه واخيسته د استاد سياف په مشرۍ د حراست او ثبات په نامه ځانګړې غونډه جوړه شوه ، خو په ارګ کې چې کومه غونډه جوړه شوه پکې ولسمشر د نورو سياسي او جهادي مشرانو د ويناو ترڅنګ دپخواني شوروي اتحاد ديرغل او په مقابل کې د افغانستان د زړورو مجاهدينو او سپيڅلي مقدس جهاد په اړه لنډه وينا وکړه ، چې په خپله وينا کې يې له طالب مشرانو څخه يو ځل بيا دپخلاينې هيله وکړه او هم يې وويل چې د سولې دعالي شورا د نوي مشر په اړه به هم دټاکنې اقدام وکړي .
پخواني شوروي اتحاد په ۱۳۵۸ دجدي په شپږمه دافغانستان په پاک اوسپېڅلي حريم يرغل وکړ، چې دکمونستي غلامانو په لارښوونه يې د هېواد په ټولو ولايتونو کې دناپالم په بمونو او ټانګونو سره کلي او کورونه کنډواله کړل.
د تور مخو کمونستانو په اشاره او مستقيمه لارښوونه يې د جهاد دسنګر مجاهدين او هم د تالاشيو په دوران کې بې ګناه ملکي وګړي ژوندي د ټانګونو لانډې په شهادت ورسول .
دا اوس چې په دولت کې په لوړ و پوستونو کې په دندو ګمارل شوي او يا په پوځ کې دامريکا او د هغوی د يرغلګرو او داړمارو سره څنګ په څنګ بيا په کلو او کورنو بمبارۍ کوي دا هغه تورې او بدنامې څېرې دي ، چې د جدي په شپږمه يې روسانو ته ديرغل زمينه برابره کړه خو لله الحمد ، لکه څرنګه چې روسانو ماتې وخوړه او په نړۍ کې رسوا شول همد غه رنګ کمونيست غلام په افغاني ټولنه کې بدنام او رسوا پاتې شو.
روسانو د۱۳۵۸ کال دجدي له شپږمې را په دې خوا په افغانستان کې ۹کلونو کې د يولک و شل زره پوځ په وحشت دتش لاسو افغانانو په مقابل کې ماتې وخوړه چې ۱۴۴۵۳پوځيانو سرونه يې په افغانستان کې پرېښودل خو ترګرمو اوبو پورې درسيدا ارمان يې په زړه کې يو وړ .
روسانو په ۹کلنه جګړه کې دلاس ته راغلي حساب په اټکل تر ۱۰۳ الوتکې ، ۱۴۷زريدار ټانګونو ، ۳۱۷ جنګي وسايل او زرپوښ ټانګنو او خپل ۷۰ کلن نظام په ورکولو سره له افغانستانه ټيټي سترګې په داسې حال کې چې پوځي جنرال ګروموف په آمو اوړيده، شکر يې وويست چې له افغانستانه ژوندی وتښتيد.
امريکا هم بايد دروسانو له تيښتې عبرت واخلي!
