کابل ټکی کام (سه شنبه، ۲۱ وری، ۱۴۰۳ل)
د راپورونو له مخې د غزې تړانګې په شمال کې د حماس اسلامي غورځنګ جنګیالیو سره په وسله والو نښتو کې ۱۶ صهیونیستي پوځيان وژل شوي او ګڼ شمېر نور ټپیان شوي دي.
د یادې ډلې د سیاسي دفتر غړي او ویاند “کابل ټکی کام” وېب سایټ ته تائید کړه، چې ځواکونو یې په تېرو ۲۴ ساعتونو کې د غزې تړانګې د شمال په بېلا بېلو برخو کې په صهیونیستي اشغالګرو ګڼ شمېر بریدونه کړي، چې په پایله کې یې ۱۶ تنه اشغالګر پوځیان وژل شوي او لسګونه نور ټپیان شوي دي.
د ویلو ده، چې صهیونیستي ريژیم د خپلو تلفاتو په اړه ګونګه پالیسي لري، تر اوسه یې د حماس غورځنګ د وروستیو ادعاوو په هکله څه نه دي ویلي؛ خو ځینو اسرائیلي رسنیو خبر ورکړی، چې د غزې تړانګې شمال کې یې پوځیانو ته مرګ ژوبله اوښتې؛ خو د کره شمېرو په اړه یې څه نه دي ویلي.
