د ايمان مسائل (دويمه برخه)

ليکوال : م، نجم الرحمن (فضلي)

د هغه چا حکم کوم چې وايي په لمانځه کې ګټه نشته

پوښتنه : يو کس کوم چې دا ډول خبرې کوي چې يوازې د لمانځه په کولو کې هيڅ ګټه نشته لکه څرنګه يې چې تاسو کوى، بلکې د انسان د زړه پاکوالى پکار دى او ښه غوره اخلاق پکار دي، د داسې کس په باره کې حکم څه دى؟.

ځواب : د داسې کس دا خبره چې د انسان زړه پاک پکار دى او غوره نيک اخلاق پکار دي دا بيخي صحي ده او په شريعت کې مطلوب هم ده، مګر دا خبره چې د لمانځه په کولو کې هيڅ ګټه نشته (نعوذ بالله) دا بيخي غلطه ده، ځکه چې د لمانځه ګټه د مسلمان لپاره په هر وخت کې دى، او يو داسې حکم کوم چې د اسلام يو مهم رکن دى که يو څوک يې غير مهم ګڼي نو د داسې کس ايمان هم په خطر کې دى، له دې بله لويه ګټه کومه يوه کيدلاى شي چې په لمانځه سره انسان له بديو فحاشيو او نورو څخه را ايساريدلاى شي ([1]).

نوى مسلمان تر څه وخته پورې نوى مسلمان وي

پوښتنه : يوه نوي مسلمان ته تر څو کلونو پورې نوى مسلمان ويل کيږي؟.

ځواب : د نوي مسلمان مطلب دا دى چې په خپله يې اسلام راوړى دى، په مسلمانه کورنۍ کې پيدا شوى نه دى، د همدغې معنى په اعتبار سره هغه ته ټول عمر نوى مسلمان ويل کيږي او دا کوم عيب نه دى ([2]).

د اسلام بنياد په څو شيانو ولاړ دى

پوښتنه : د اسلام بنياد په څو شيانو ولاړ دی؟

ځواب : د اسلام بنياد په پنځو شيانو ولاړ دی او هغه پنځه شيان دا دي:

(۱) کلمه طيبه يا کلمه شهادة په زړه سره منل او په ژبه سره اقرار کول.

(۲) لمونځ کول.

(۳) زکوة ورکول.

(۴) د رمضان المبارک په مياشت کې روژه نيول.

(۵) حج کول ([3]).

د شيطاني وسوسو له امله ايمان نه ضايع کيږي

پوښتنه : يو کس د شريعت پابند دى، يوه ورځ د يوه کتاب د مطالعه کولو په وخت کې د هغه په زړه کې شيطاني وسوسه راغله چې زه مسلمان نه يم، بلکې مرتد شوى يم، مګر نه يې کوم داسې انکار کړى او نه يې کومه داسې ګناه کړې چې هغه د ده په کفر دلالت وکړي، او داسې کس د ډيرې ويرې له امله ډير پريشان دى چې د قيامت په ورځ به زه الله تعالى جل جلاله او جناب رسول الله صلی الله عليه وسلم ته په کومو سترګو ګورم، له دې وروسته يې د کلمه طيبه، لاحول او د استغفار ورد شروع کړ او د همدغې وسوسې د ليرې کولو لپاره يې وويل : اې شيطانه ! تر اوسه پورې زه مسلمان وم او که نه؟ مګر اوس هم مسلمان يم، ته که هر څومره وسوسې واچوې، او دى پوه شو چې دا شيطاني وسوسه دى، اوس پوښتنه دا ده چې په دې کې خو به داسې کومه خطرناکه خبره نه وي کومه چې له ايمان سره منافي وي؟.

ځواب : په داسې شيطاني وسوسو سره ايمان نه زايله کيږي، الحمد لله د داسې کس ايمان په ځاى دى، کلمه طيبه او لاحول دې په کثرت سره وايي او هره ورځ دې د ځان پر مؤمن کيدو د الله تعالى جل جلاله شکر اداء کړي ([4]).

([1]) فتاوى عباد الرحمن، ١ : ص، ٨، بحواله : سورة العنکبوت، پاره : ٢١، آيت : ٤٥.

([2]) فتاوى محموديه، ١ : ١٨٨.

([3]) تعليم الاسلام، دويمه برخه : ص، ٢.

([4]) فتاوى محموديه، ١ : ١٩٥، بحواله : مشکوة المصابيح، کتاب الايمان، باب في الوسوسة، ج : ١، ص : ١٨، مرقاة المفاتيح، کتاب الايمان، باب في الوسوسة، ج : ١، ص : ٢٣٨، وکذا في فتح الباري، کتاب الايمان، باب قول النبي صلی الله عليه وسلم (انا اعلمکم بالله وان المعرفة فعل القلب ….. الخ) ج : ١، ص : ٩٧، ومجمع الانهر، باب المرتد، ج : ١، ص : ٦٨٨.