کابل ټکی کام (پنجشنبه، ۱۸ غویی، ۱۴۰۴ل)
د مالیې وزارت اړوند د نفتی موادو او کیفیت څار ریاست وايي، چې د نفتی موادو د کیفیت ارزونې په لړ کې، د روان لمریز کال له پیله تر دې دمه، له فراه او نيمروز ګمرکونو دروازو ۱۰۴ ټانکره بېکیفیته تیل بېرته ګرځول شوي دي.
یاد وزارت په خبرپاڼه کې راغلي چې د دې ټانکرونو د تېلو کیفیت د تخنیکي معیارونو سره سم نهو، چې له امله یې هېواد ته د ننوتو اجازه ورنکړل شوه زياتوي له دغو ټانکرونو څخه ۷۳ یې د فراه ولایت د ابونصر فراهي ګمرک او ۳۱ نور یې د نیمروز ولایت د پل ابریشم له لارې واردېدل.
د مالیې وزارت مسؤلین وایي، دا اقدام د دې لپاره شوی ترڅو د هېواد بازار ته یوازې معیاري او د تخنیکي اصولو سره سم تېل ورسېږي، او د ټیټ کیفیت لرونکي موادو له واردېدو مخنیوی وشي.
سرچینه زیاتوي چې د نفتی موادو د واردېدو پر مهال به د کیفیت ارزونه لا جدي شي او هېڅ هغه شرکت ته به د موادو د داخلېدو اجازه ورنکړل شي چې محصولات یې له نړیوالو معیارونو سره برابر نهوي.
