کابل کې جي اوه جمع، غونډه بې ګټې پای ته ورسيده
« سرليکنه »
په کابل کې جي اوه جمع (G7+) څلورمه غونډه په داسې حال کې پېل شوه ، چې د غونډې د مقصد په خلاف راپورونه د ۲۴ ولايتونو څخه د غونډې د دوام پر مهال ورکړل شول.
(G7+) جمع غونډه په دې موخه په کابل کې جوړه شوې وه ، چې جګړې پای ته ورسېږي او ټول امنيتې ګواښونه ، چې نړۍ او په ځانګړې توګه افغانستان ورسره مخ دی له منځه يوړلی شي.
په دې غونډه کې تر شلو پورې د هغو هېوادونو د بهرنيو چارو وزيرانو ، سياسي استازو او کارپوهانو برخه اخيستې وه .
کوم هېوادونه ، چې جګړو ځپلي او يا اوس هم پکې جګړې روانې دي د هغوی په اړه او هم د افغانستان په اړه اجنډادا وه، چې د جګړو د پای ته رسولو لپاره لازم تصميم ونيول شي.
په دې غونډه کې ولسمشر اشرف غني د بهرنيو چارو وزير صلاح الدين رباني او د کابينې يو شمېر غړو برخه واخيسته ،چې په کابل کې د بهرنيو هېوادونو سفيرانو او د يپلوماتانو ، چې په غونډه کې يې ګډون کړی و، دا تمه درلوده ، چې کومه پرېکړه به وشي او د هغې پرېکړې پر بنسټ به نوره جګړه پای ته ورسول شي.
په دې غونډه کې د شلو هېوادونو د بهرنيو چارو ټولو وزيرانو او نمايند ګانو په دې موخه برخه اخيستې وه ، چې هېواديې له جګړې وژغورل شي ؛ ځکه د ملګرو ملتونو په کچه ، چې کله يعنې په ۲۰۱۵م کال کې د (G7+) جمع هېوادونو ، چې دا مهال يې شمېر ۲۰ هېوادونو ته رسېږي غونډه جوړه شوه په دې معنا وه، چې د خپلو هېوادونو د ستونزو د حل په اړه به لازم تصميم پکې نيول کېږي او د عملي کيدو لپاره به د ملګرو ملتونو د امنيت شورا ته وړاندې کېږي.
په دې غونډه کې ولسمشر اشرف غني په خپله ويناکې د غونډې برخوالو ته په ځای د دې ، چې افغانستان او نورو هېوادونو ته په ورپېښو ستونزو او امنيتي ګواښونو خبرې وکړي په اړه يې پريکنده تصميم غوښتنه وکړي؛ په خپل هېواد کې يې د فساد او امنيتي ستونزو ژړا اوفرياد پېل کړ ، چې دا ژړا او فرياد د اشرف غني د هرې غونډې د وينا يوه برخه ده.
اشرف غني په هېواد کې راپېښو ستونزو او امنيتي ګواښونو يا دونه د شعاره په شکل وکړه ، موږ دا منو چې اداري فساد په هېواد کې په ځينو برخو کې خدمتونه تر اغيز لاندې راوستي دي نا سالم مديريت د انکشافي بوديجې استعمال په ناسالم لوري روان کړی دی ؛ خو په اړه يې شعار نه؛ بلکې قاطع تصميم پکاردی ، چې بې روزګاري ورځ په ورځ مخ پر زياتيدو ده؛ خو د نه تصميم نيولو له امله دا غونډه هم بې ګټې پای ته ورسيده.
