لیکوال : ع.اسد خیل
کله چې اشرف غني د قدرت په ګدۍ کیناست نو خلکو د افغانستان د پرمختګ او اقتصادي رغونې خوبونه لیدل، ټولو دا فکر کاوه چې ګوندې اشرف غني یو اقتصاد پوه شخصیت دی چې په ډیری هیوادونو کې یې هم اقتصادی رغوني تر سره کړي دي؛ اوس د حالت په لیدلو او د حقیقت په ښکاره کیدلو خلکو ته شک پیدا شوی دی چې آیا د اشرف غني په هکله دغه ډول معلوماتو حقیقت درلود او که محض د هغه لپاره د بهرنیانو د چینلونو پوچ تبلیغات وو، ځکه چې خلکو په خپلو سترګو ولیدل چې د نوموړي قدرت ته په رسیدو سره سم د افغانستان هر اړخیز اقتصاد مخ په شړیدو پیل وکړ.
د افغانستان پولي سیستم سخت کمزوری شو د افغانۍ پولي واحد ورځ تر بلې د نورو هیوادونو د اسعارو په مقابل کې مخ په ښکیدو شو، کاروباریان د کاروبار له کمزورې کیدو نه سر ټکوي، ځکه چې عایدات یې د نشت برابر شوي دي، د ځمکو د پیرلو او پیردلو نرخونه نیم په نیمه راپریوتي دي، کرایې کورونه تش پاتي دي، واردوونکی او صادروونکي د پیسو په سر یو د بل ګریوانونه شلوي، سرمایه اچوونکو خپله سرمایه اچونه معطل کړې ده، ځوانان له هیواد نه په تیښته کې د خیالي جنت خوبونه ويني، د کورونو او بلډنګونو ابادیانی ځای پر ځای ولاړې دي، د ښارونو په چوکونو کې د کارګرانو او مزدورانو ځای نشته، بزګران د حاصلاتو د نه خرڅیدو یا په کمه بیه خرڅیدو نه لالهانده دي، امنیت د نیشت برابر شوی دی، هر سړی په دې هڅه کې دی چې له افغانستان نه پښې سپکې کړي، همدا راز هیواد ته د ګډو د راتلو په بهیر کې حیرانوونکی کموالی رامینځته شوی دی، په دولتي ارګانونو کې فساد غلا، چور، او اختلاس خپل اوج ته رسیدلی دی.
دا او داسی نور، ټول ملت او نړیوالو ته د لمر په څیر ښکاره دی او هر څه په خپلو سترګو ګوري، خو سره له دې اشرف غني او د ده د بنډار انډیوالان او ورسره په څنګ کې د شاهزادګي ډاکټر عبدالله او د هغه لنډغر لا هم په خپل مشرتابه ټینګار کوي او ملت ته حالات داسې ښي لکه هیڅ هم چی نه وي، او خیر خیریت وي او د افغانستان حکومتي سیستم د نورو هیوادونو په څیر په نورمان ډول روان وي، له بلې خوا هغه تمیلوونکي نړیوال هیوادونه چې دغه حکومت یې تر افغانستانه په کش کولو رارسولی او لا یې هم په پښو درولی او ساتلی، هم د خپلو کومو نامعلومو موخو په خاطر داسې چوپتیا غوره کړې چې په هیڅ منطق او ملي او بین المللی اصولو برابره نده.
دا او داسې نور له دې ټولو نه په ډاګه جوتیږی چې: د ملي وحدت حکومت د خپلو انتخاباتي کمپاینونو پر مهال ملت ته ښکرور درواغ ویلي وو او اوس لا هم درواغو ته دوام ورکوي او په ضمن کې يې اوس د کبر او غرور خبرې هم تازه پیل کړي دی، نو ځکه ويلای شو چې دغو درواغو او کبر د دې حکومت پاتې کیدل ناشوني کړي دي، ځکه چې یو خو:
د درواغو مزل لنډ وي
او بل:
د کبر جن کاسه چپه ده *** لاس یې تش خوله یې سپیره ده
د قانع ډوډۍ پخه ده *** لاس یې ډک خوله یې خوږه ده
او یو حدیث شریف هم د کبرجن د تباه کیدو زیری ورکوي او فرمایی چې: (من تکبر قصمه الله) که چا کبر وکړ نو خدای به یې ټوټې ټوټې کړي.
نو لرې نه ده چې د پورته حدیث شریف او پښتني متل او شعر له مصداق سره سم د دغه درواغجن او کبرجن حکومت بد انجام ملت او نړیوال په خپلو سترګو وګوري اوډیر زربه پخپله او یا هم د ملت په طوفاني قیام په ګرداو کې ونښلي او رانسکور کړای شي، چې بیا به هر یو د خپلو کړو جنایاتو پوښتنو ته ځواب ورکوونکی وي.
