شاعر/ امان الله نصرت
ستا حسن به د زړه په پرهرونو کې کرو
خندا به دې د اوښکو په موجونو کې کرو
لاسونه به دې تاو کړمه سپوږمۍ له سپينې غاړې
ستا ښکلې پلوشې په منزلونو کې کرو
تيارو راڅخه وړى سپين سبا دى دا څو کا له
ستا څرک اى رڼا ځکه منزلونو کې کرو
د سولې ښاپيرۍ کله به رسو ستا درشل ته
د وصل تلوسې دې په فکرونو کې کرو
تقدير مونږه له هست څخه يو مخکې نا بود کړي
ژوندون چې مرګ نه مخکې په قبرونو کې کرو
ما ويل ګوندې اختر که مو دې شاړ کلي ته راشي
نکريزې په زخمي- زخمي لاسونو کې کرو
پېغام د سولې امن ګوندې راوړي ګران هېواد ته
ګلونه د نارنج د جنګ اورونو کې کرو
د پېغلو په قبرونو که بيا شنه ښکلي چنار شي
شهيد – شهيد منګي په ګودرونو کې کرو
سپرلي د زمانې به په سجدو کړو ستا ښکلا ته
وطنه دا ستا مينه به په زړونو کې کرو
ای ښکليه ننګرهاره اى د سرو ګلونو هاره
وږمې به دې په زلفو ولونو ولونو کې کرو
نصرته ! ستا د زړه دنيا ده ډکه له تڼاکو
تنکي – تنکي زخمونه دې ګلونو کې کرو
