سرلیکنه
تېره ورځ چې د پوځ په رینجر موټر کې د طالبانو یو مسئول د انتقال پر مهال ولیدل او ونیول شو، پر دولت د طالبانو پرلپسې بریدونو او د ځینو سیمو نیولو دومره بد اغیز نه وکړی، لکه څومره چې په پوځي رینجر موټر کې د طالبانو د مسئول انتقال پر دولت وکړ.
په پوځ او نورو دولتي اداروکې د طالبانو نفوذ یواځې په پوځي رینجرموټر کې د طالبانو د مسئول انتقال نه دی. په تیرو ۱۵کلونو کې، چې څومره پیښې د کابل په مرکز او نورو ولایتونو او ولسوالیوکې شوي دي، طالبانو په داخل د مرکز او ښارونو کې کامیاب عملیات تر سره کړي دي، ان ځینې وخت په پوستوکې ځایي پولیسو خپل ملګري وژلي دي، داټول هغه څه دي، چې طالبانو په داخل دحکومت کې له خپل نفوذ څخه په ګټې اخستنې سره کړي دي.
په ولسي جرګه کې، چې په دولت کې دطالبانو د نفوذ په اړه کوم بحث وشو زیاته اندیښنه پدې وښودل شوه، چې تر اوسه پورې په دولتي رینجر موټر کې د طالبانو د مسئول انتقال نه و لیدل شوی او که څه کېدل دومره په پوځي کچه چا دطالبانو سره مرسته نه وه کړې او که ېې کړې هم وه، خو پدې اندازه نه وه ښکاره شوې.
دې پېښې وښودله، چې طالبانو یواځې په سنګر کې نه بلکې په داخل د ښارونو کې د پوځ سره په اړیکو او د خپلو نفوذي کسانو په کومک سره هرډول عملیات ترسره کولای شي.
ولسي جرګې د طالبانوسره په اړیکو او په پوځ کې د طالبانو دنفوذ په اړیه وویل، چې باید دا ډول کسان مجازات شي.
د ولسي جرګې د ځینوغړو غوښتنه به د دولت لپاره ګټوره وي، خو لکه څرنګه چې يې په داخل د پوځ کې د طالبانو د نفوذ په اړه معلومات نه درلودل، دا ډول په نورو ادارو کې هم د طالبانو د نفوذ څخه هم نا خبره دي .
که ولسي جرګه د طالبانو سره هغه کسان چې اړیکې لري مجازات غواړي، نو بیاخو به د هېوادپه داخل کې د ټولو ادارو اشخاص مجازات کیږي، ځکه طالبانو اوس په ټولو دولتي اداروکې په خپلواړیکوسره زیات نفوذ کړی دی.
په داخل د پوځ کې د طالبانو د نفوذ اندیښنه یواځې د ولسي جرګې، ملي امنیت او ددفاع وزارت نه ده، بلکې د افغانستان لپاره د امریکايي پوځونو قوماندان جان نیکولسن هم ښودلې ده او ویلي یې دي، چې د امریکا دفاع وزارت باید په افغانستان کې د طالبانو د بریدونو په زیاتوالي یو جدي تصمیم ونیسي، ځکه طالبانو غواړي د یو شمېر سیمو د نیولو سربېره نورې سیمې هم ونیسي.
دا مهال په افغانستان کې د بهرنیو پوځونو شمیر تر۹۸۰۰پورې رسیږي او د مهالویش له مخې باید راتلونکي کال کې تر۵۵۰۰پورې راکم کړل شي، خو په افغانستان کې د امریکايي پوځونو قوماندان جان نیکولسن د اندیښنې په ښودلو سره زیاته کړې، چې له یوې خوا د طالبانو د بریدونو زیاتوالی او له بلې خوا په پوځ او نورو دولتي اداروکې د طالبانو نفوذ به امنیتي ستونزې لا زیاتې کړي.
یاد قوماندان په خپل راپور کې دسپینې ماڼۍ څخه غوښتي، چې په افغانستان کې د امینت په اړه جدي اقدامات وکړي.
امریکا چې هر کال د افغانستان سره د پوځي او نورو بیلابیلو برخو لپاره څلور ملیارده مرسته کوي غواړي د طالبانو د مخ په زیاتیدونکو بریدونو په اړه د هوایي پوځ د عملیاتو علاوه د امنیت د کنترول لپاره پوره تصمیم ونیسي.
په روان کال کې د تیرو کلونو په نسبت د طالبانو بریدونه زیات شوي دي، خو تر هر څه زیات په پوځ کې د طالبانو نفوذ پر دولت ترجګړې زیات غیز کړی دی.
