سرلیکنه
ولسمشر اشرف غني چې د انتخاباتي ګډو ډیو او ناندرو وروسته د ولسمشرۍ لوړه وکړه په لومړۍ وینا کې ېې وویل:
زه به د حکومت د پیل په کارونو کې امن، اقتصاد او ښوونې ته لومړیتوب ورکړم!
دا د ولسمشر د پنځوسو ژمنوڅخه درې د حکومتي کارونو د لومړیتوب ژمنې وې؛ خوترټولو لومړی ېې، چې ولس ېې له ځانه خوښ کړ د اداري فساد دله منځه وړلو پریکړه وکړه، چې د اداري فساد ګوته ېې د هیواد په ټولو فسادي ادارو کې سترې محکمې ته ونیوله، وی ویل اصلاح به له سترې محکمې څخه پیلوم.
افغانان د سلطان محمود غزنوي لخوا په ۴۱۶هجري قمري د هندوستان په ګجرات کې د سومنات بت په ماتولو باندی دومره نه وو خوښ شوي څومره چې د اشرف غني لخوا له هیواده د اداري فساد په له منځه وړلو خوښ شول .
د اشرف غنی لومړیو ویناو ته افغانانو دوه ډوله خوښي ښودله، یوه دا چې که اداري فساد له منځه ولاړ شی او پرافغانستان له بهره د ډالرو باران دوام ولري نو افغانستان خو په نړیواله کچه د سوداګرۍ باوري هیواد چې په ۱۹۴۶میلادي کې ېې د ملګروملتونو غړیتوب ترلاسه کړی دی ډیر ژر به د نړیوالیو سره په سوداګریز ډګرکې سیال شي.
هغه هیلې چې افغان ولس له موجوده ولسمشره لرلې د اختلافاتو له امله په دریاب لاهو شوې، ځکه د ۱۳۹۳هجري د تلې دمیاشتې له ومې ۷ مې نیټې څخه چې اشرف غني د حکومت واک ترلاسه کړې داسې څه ېې ونه کړل چې د ولس د ستونزو کمه برخه هم حل کړي، بلکې اداري فساد په نوو نوو بڼو او ادارو په جوړولو نورهم زیات شو.
د اداري فساد سره د مبارزې لپاره د حکومت په نوي تشکیل د ولسي جرګې یو شمیرغړي او د فساد پر وړاندی د مبارزې عدلیې او فضایي مرکز په کارونو بې باوره دي وایي دا د اداري فساد سره د مبارزی مرکز د قانون خلاف او د افغان ولس د تیر ایستلو لپاره جوړشوی مرکزدی.
د ولسي جرګې غړي رمضان بشردوست په ډاګه وویل، دا ډول مرکز جوړول د قانون پرخلاف عمل دی او هم په سیاسي ترکیب جوړشوی دی، لکه څرنګه چې په تیروکلونوکې ولس ته دوکه ورکړل شوې دارنګه موجوده اداره غواړي له دې وروسته هم ولس تیرباسي.
افغان ولس د مجرمینو لپاره چې څوک په اداري فساد کې ککړ وي د یوې عادلانه ادارې غوښتونکي دي، خو دانه چې د اداري فساد په نامه جوړه اداره دې په ځای د دې چې په فساد کې ککړ کسان محاکمه کړي د هغوی لپاره د اداري فساد له لارې تر لاسه شوو شتمنیو ته دهضم لاره برابره کړي .
تر اوسه پورې د اداري فساد پرضد ادارې یو په فساد کې ککړمجرم هم نه دی محاکمه کړی، چې د کابل بانک موضوع د هرافغان په وړاندی یو ښکاره ثبوت دی.
د اداري فساد سره د مبارزې په مرکز ځکه څوک باورنه لري، چې دا مرکز د سیاسي مصلحتونو له مخې له مفسدینو جوړ دی حکومت غواړي په فساد کې ککړ یاران له محاکمې وژغوري، کله چې په یوه حکومت کې محاکمه نه وي بیاکه هرڅومره اداري فساد وشي هغه هضمیږي.
