لېکنه : اسدالله غيرت
تاريخ زما د اوږدې تاريخي مخينې، ميړانې ، ننګ او غيرت شاهد دی. ما مې په خپله شډله بډله غيږه کې داسې اتلان او د هېواد په مينه مين زلمي لرل، چې د وخت لوی لوی زبرځواکونه او فرغوني لښکرې يې د دنيا له مخه ورکې کړې. په دې کې شک نه شته چې زما له طبعي ښکلاوو جوړه غيږه د ریښتينو او اصيلو بچيانو لپاره جنت وه او هغه چا ته مې په خپله غيږه کې کله هم ځای نه دی ورکړی، کوم چې خاينان او پرديپال و .
خو نن، زه مې په خپل حال افسوس کوم، ما کله هم داسې فکر نه کاوه، چې زه دې داسې شم، نن زما سترګې ټيټې دي، زه په خپله غيږه کې د رالويو شويو له لاسه له شرمه چا ته کتلی نه شم.
تاسو ګورئ چې زما په غيږ کې ډيری رالوی شوي، زما له تاريخي نوم نه په ګټې اخستنې پر ما او زما په غيږ کې پر بې وسو خلکو تجارت کوي، دوی دا کار په پوره ميړانه او سپين سترګۍ ترسره کوي.
زما په غيږ کې ډيری وږي تږي، لوڅ لغړ ماشومان او ښځې په يوه ګوله ډوډۍ پسې هم حيران دريان دي، زه هر وخت د همدې بې وسو پر حال اوښکې تويوم او په درد يې درديږم؛ خو هۍ افسوس چې زما پر غيږه واکمن کسان بيا دا چيغې او فريادونه کله اوري ، دوی يوازې د خپلو ګيډو غم پسې اخستي دي، زما د تن په وينو خپلې ګيدې ډکوي او دا کار خپل رښتينی رسالت ګڼي.
زما د غيږې طبعي ښکلاګانې د تبرونو په تيرو څوکو غوڅې شوې، هيچا هم زما ددې عظيمې شتمنۍ د ساتلو مخنيوی ونشو کړای، زما د غيږې پر قيمتي کاڼو د پرديو هېوادونو بنګلې ابادې شوې؛ خو هۍ افسوس چې هيچا را ونه ګرځولې. زما په غيږ کې د بې وسه او بې کسه بچيانو سره، روانې بې عدالتۍ د عرش ستنې ولړزولې؛ خو هۍ افسوس چې د وخت د حاکمو چارواکو په زړه کې يې د نوک هومره زړه سوی هم راپيدا نکړ .
زه د نړۍ پر مخ د انسانانو هغه بدمرغه غيږه يم چې خپلو او پرديو هيچا راباندې زره قدرې زړه سوی او رحم هم ونکړ، زما د وجود ښکلاګانې يې لوټ کړې، زما له وياړه ډک تاريخ يې له خاورو سره خاورې کړ، له ما سره یې د مور او ميرې چلند تر سره کړ او بلاخره هغه څه چې يې غوښتل، هغه يې ټول راسره وکړل .
زما د غيږې استازو زما د ښايست په پيسو او زما د بچيانو پر حقوقو لویې لویې ماڼۍ جوړې کړې، زما پر خاوره واکمنو زما په سترګو کې خاورې وشيندلې او زما د ښايست ګاڼې يې ولوټلې، زما د غيږې مدني فعالانو او ژورناليستانو، زما پر بچيانو د روانې بې عدالتۍ د غږ اوچتولو په بدل کې پيسې واخستې او په لوی لاس يې په حقيقتونو سترګې پټې کړې.
ته، اې زما خدايه ! ما له اوسني حالت څخه را وباسه، زما پر حال رحم وکړه او زما د غيږې بچيانو ته د نېکۍ هدايت وکړه.
تاسو اې زما په غيږه کې رالويو شويو او زما په وينو تجارت کوونکو بچيانو! هغه ورځ لرې نه ده چې تاسو به يو ځل بيا زما په غيږه کې ويده کيږۍ او زما په پړوني کې به خپل مغرور سرونه پټوی، نو تاسو به زما پر وړاندې خدای ته د ترسره شويو بدمرغه کړنو ځواب څنګه ورکوی ؟
چې ماشومانو ته ورپاته شوله
دا غرنۍ پکتيا ميراته شوله
۱۳۹۵/۸/۲۸ ګرديز
