سرلیکنه
په ۱۹۶۳ میلادي کال د مارچ په ۳۰مه چې ډاکټر محمد یوسف صدراعظم شو، په لومړي ځل تر ټولو هېوادونو لومړی ورته د امریکا جمهور رئیس جان ایف کینډي مبارکي راولېږله، هغه مهال د افغانستان د بهرنیو چارو د وزارت مرستیال نور احمد اعتمادي د افغانستان او امریکا ترمنځ د اړیکو په ښه والي کې اهم رول ترسره کړی وو، امریکا هم غوښتل د سیمې د سیاست سره سم افغانستان سره ښې اړیکې ولري او افغانستان د پخواني شوروي اتحاد سره د دوستۍ غښتلتیا ته پرېنږدي.
په ۱۹ سوه پنځه او شپږمه لسیزه کې د افغانستان پر سر د امریکا او پخواني شوروي اتحاد ترمنځ سیاسي او فرهنګي سیالي روانه وه.
په ۱۹۶۳ میلادي کال د اپریل په ۳۰مه چې د افغانستان او پخواني شوروي اتحاد ترمنځ د فرهنګي همکاریو موافقه په کابل کې لاسلیک شوه، د سیمې د هېوادونو ترمنځ هم د افغانستان سره د نږدېوالي اراده وکړه، چې د هغه وخت د هند جمهور رئیس دادکرشنان د فرهنګي همکاریو په موخه د یوه پلاوي په مشرۍ کابل ته راغی.
د امریکا او پخواني شوروي اتحاد ترمنځ د افغانستان په اړه سیالي په ۱۹۶۳ میلادي کال د جون میاشتې په ۱۶مه، وروسته له هغې چې د شوروي اتحاد د عالي شورا رئیس لیوند برژنف کابل ته د راتلو اعلان وکړ؛ زیاته شوه.
امریکا د افغانستان سره په ۱۹۶۳ میلادي کال د جولای میاشتې په ۱۶مه د ۴۷۰۰۰ زرو ټنو غنمو د ورکړې موافقه وکړه.
امریکا غوښتل چې په ۱۹۵۳ کې د افغانستان سره د وسلو د کړي قرارداد د انکار اِزاله وکړي او ټول زړه بداوي له منځه یوسي، ځکه خو یې د ۱۹۶۳ میلادي کال د سپټمبر په دویمه د افغانستان وفات پادشاه محمد ظاهر شاه ملکې او لوړپوړي دولتي پلاوي ته د امریکا بلنه ورکړه، له یادې نېټې دوه ورځې وروسته د ظاهر شاه د دولت لوړپوړي چارواکي د صدارت عظمی مرستیال عبدالله ملکیار د اطلاعات او کلتور مشاور استاد خلیل الله خلیلي، د عظمی صدارت د تشریفاتو رئیس محمد امین اعتمادي په امریکا کې د لوړپوړو چارواکو سره د ښو اړیکو ساتلو ژمنې وکړې، خو امریکايي چارواکو د پخواني شوروي اتحاد عالي شورا د غړي اربانوف له سیاسته چې د افغانستان په اړه یې خپل کړی وو، وېره درلوده.
د امریکا جمهور رئیس جان ایف کینډي په واشنګټن کې د افغانستان د سفیر ډاکټر عبدالمجید سره په پرلپسې مېلمستیاوو کې اړیکې زیاتې ښې کړې.
روسانو د امریکا پر خلاف افغانستان ته ځان نږدې کاوو، خو په ۱۹۶۴ میلادي کال د جنورې په ۳مه د امریکا د بهرنیو چارو د وزارت ویاند مکنامار په یوه مطبوعاتي غونډه کې وویل، که روسان افغانستان سره اړیکې هر څو ښې کړي، بیا به هم افغانستان زمونږ په واک کې وي.
د افغانستان پخواني بادشاه په ۴۰ کالو حکومت کې د روسانو او امریکا دواړو سره اړیکې ساتلې، خو د امریکا پخواني جمهور رئیس هري آس ترومن د پالیسۍ له امله د افغانستان سره اړیکې یو څه خړې شوې، چې روسانو د همدې خړو اړیکو څخه ګټه پورته کړه او افغان چارواکي یې خپل لور ته نږدې کړل.
که څه هم د افغانستان سره د امریکا د جمهور رئیسانو روزل، لیندن جانسن اړیکې ښې شوې، جیمي کارټر، رونالد ریګن، جورج بوش، بل کلنټن او اوباما د افغانستان سره د (C.I.A) پالیسي روانه وساتله، اوس به څرګنده شي، چې د امریکا نوی جمهور رئیس ډونالډ ټرمپ به د افغانستان سره تاریخي اړیکې وساتي او که د لاسه به یې ورکړي؟
