دعا
ملا محمد مطمئن
دعا
د غلامۍ زنځير کړه مات بس خپلواکي راوله
له جنګه ستړي يو خالقه ارامي راوله
ژورې کندې د نفاق نه مو نجات نصيب کړه
د اتحاد مزی مو کلک کړه ورورولي راوله
ډېرې ځوانۍ د انقلاب سپېرې بلا وخوړې
نور رانه مه غواړه سرونه ازادي راوله
د وخت حالاتو ته په ورين تندي ور غاړې وتوو
مولا خلوص راکې پيدا کړه خاکساري راوله
تر څو به توره ترږمۍ موږ مزلونه و هوو
دا توره شپه راته رڼا کړه روښنايي راوله
د زړه په دښته مو خزان راته کېږدۍ وهلې
بهاره مونږ سره دمه شه خوشحالي راوله
زه ( مطمئن ) درنه همېش دغه يو سوال کومه
د سر دښمن مو خدايه پښو ته سلامي راوله
