په هندوستان کې د یو کس برېتونه د رسۍ په څېر اوږده دي.
د هندوستان د جې پور ښار اوسېدونکي رام سینګ چوهان برېتونه ۱۸،۵ فټه اوږدوالی لري.
۶۲ کلن رام سینګ له ۱۹۷۰ز کال راهیسې خپل برېتونه غټول پیل کړي دي او هره ورځ د برېتونو په سمولو باندې دوه ساعته وخت لګوي.
رام سینګ وايي، ”ږیره او برېتونه د نارینه د ویاړ نښه ده – ما هم د خپلو برېتونو له امله نوم، شهرت او عزت ګټلی دی.“ رام سینګ زیاتوي چې له ولسمشره نیولې تر عام کسه پورې ټول د اوږدو برېتونو درلودلو له امله له ده سره ښه او له درناوي ډک چلند کوي.
رام سینګ د خپلو برېتونو د ساتنې په اړه وايي، ”زه هره ورځ دوه او یا یونیم ساعت د برېتونو په چمتو کولو تېروم – خو په دوو اوونیو کې یې یو ځل وینځم.“
۷ کاله وړاندې د رام سینګ برېتونه د نړۍ تر ټولو اوږده برېتونه وبلل شول او نوم یې د ریکارډ په ډول د ”ګینیز بُک آف ورلډ ریکارډز“ کې ولیکل شو.
