ډاکټر آصف
له کله نه چې شمالي کوریا پر امریکا خپله بلوسیدا پیل کړې له همغې ورځې پر امریکایانو او په ځانګړې توګه پر ښاغلي ټرمپ د ټوغکي مرض لګیدلی، هسې په هسې یې لینګي رپیږي، او لکه د سیند اخیستې هر بوټي او زګ ته لاس اچوي څو ځان نړیوالو ته له شرمیدا وژغوري.
خو د هر ظالم پر وړاندې بالآخره خدای تعالی داسې یو څوک پیداکوي چې د ظالم ښکرونه مات او غوږونه یې څړ کړی.
د انساني تاریخ په اوږدو کې هیڅکله خدای تعالی یو مظلوم تل مظلوم ندی پریښی او نه یې زورور او ظالم تر زورور تل زورور پاتې کړی، بلکې د یا یې د مظلوم په لاس ظالم په ګونډو کړی او یا یې هم ظالم ته داسې بل ظالم پیدا کړی چې ظالم یې ورته ګوته په غاښ کړی.
لکه څنګه چې ښکرور شوروي خدای تعالی د مظلومو او بیچاره افغانانو په لاسونو رانسکور کړ، اوس خدای تعالی امریکا ته د شمالي کوریا په شکل کې داسې عذاب را پیدا کړ چې وینو امریکا له هر چا سره پنجه وهلې ده خو د شمالي کوریا له پنجې سخت ځان ساتي.
امریکا او ټرمپ ته همدغه شرم کفایت کوي چې تیره ورځ شمالي کوریا ته د سفر پر مهال له دې وویریدو چې د شمالي او جنوبي کوریا تر مینځ پرتې با امنه سیمې ته سفر قدرې وکړي، او په ښکرورو دروغو ویلو یې د نړۍ له شرمه ځان خلاص کړ چې ګوندې په سیمه کې دهوا د خراب والي له کبله یې دغه سفر ونکړ، حال دا چې هوا هیڅ ډول خرابوالی نه درلود بلکې ټرمپ ښه پوهیدو چې په اصل کې د شمالي کوریا د مشر جون طبیعت ورته بیخي خراب و، که ټرمپ دغې سیمې ته سفرکړی وای کیدای شي بیرته ژوندی نه وای وتلی.
نو هوا نه وه خرابه بلکې د جون فضا ورته خرابه وه
