تېره ورځ د بلجيم په پلازمېني، بروکسل کې د افغانستان په اړه د ناټو د دفاع وزيرانو غونډه جوړه شوه چې په افغانستان کې د ناټو د غړیو هېوادونو هر يوه دفاع وزير په خپل وار غونډې ته ويناو وکړه او هم په افغانستان کې د روانې جګړې په اړه بحثونه وشول.
د بروکسل په غونډه کې د اجنډا له مخې، په افغانستان کې د جګړې په دوام د غوڅ ملاتړ د ماموريت په اړه خبرې تر ټولو مهمې وې چې څرنګه د ناټو غړي هېوادونه په افغانستان کې خپله پاتې دنده سرته ورسوي. د ناټو عمومي منشي، ینس سټولټنبرګ د ناټو د دفاع وزیرانو د غونډې په لومړۍ ورځ خبریالانو ته وویل چې افغانستان ته د نورو پوځیانو د لېږلو موضوع سبا ورځ د غونډې د بحث یوه اساسي مسئله ده، چې د غونډې تر پایه پورې به د همدې موضوع په اړه خبرې روانې وي څو ګټوره نتيجه ترلاسه شي.
تېره ورځ رسنيو افغانستان ته د ناټو د نورو پوځونو د لېږلو خبر ورکړی و، خو دا نه وه څرګنده چې د دې درې زرو پوځونو لېږلو وروسته به بل کوم تصميم ونيول شي او که نه. د ناټو عمومي منشي، ینس سټولټنبرګ وويل: په دې اړه هم بايد په دې غونډه کې خبره روښانه شي.
د ناټو عمومي منشي ینس سټولټنبرګ د بلجیم په مرکز بروکسل کې خبري غونډې ته ويلي دي چې د دوی ځواکونه به په افغانستان کې پاتې شي، ترڅو افغان ځواکونه وروزي او د حکومت د مخالفو وسله والو په مقابل کې جګړې ته دوام ورکړي.
له دې نه دا څرګنده شوه چې په افغانستان کې، د ينس سټولټنبرګ په وينا، د ناټو پوځونه بايد د جګړې تر دوام پورې پاتې وي. په افغانستان کې امريکا داسې حالات رامنځته کړي چې د بهرنيانو په شتون به جګړه دوام لري.
خپله د سيګار په شمول همدا بهرني بنسټونه په خپلو راپورونو کې څرګندوي چې دا مهال وسله وال طالبان څلوېښت سلنه خاوره په خپل کنټرول کې لري، خو په بروکسل غونډه کې ينس سټولټنبرګ وايي چې په تېر کال کې مو وسله وال طالبان خپلو هدفونو ترلاسه کولو ته نه دې پرېښي.
په افغانستان کې د جګړې د دوام لپاره امريکايي چارواکي وايي چې زموږ پوځونه به د افغان پوځونو روزنه کوي او د اړتيا پر مهال به ورسره هوايي او ځمکنۍ مرسته هم کوي، خو د ناټو عمومي منشي بيا وايي چې د جګړې په موجوديت سره به ناټو پوځونه افغان پوځونوته روزنه ورکوي او هم به د پارلماني انتخاباتو او له هغې وروسته چې د ولسمشري انتخابات ترسره کېږي، د ناټو پوځونه به ټول امنيت په لاس کې لري.
له يوې خوا افغان ولس نور د تپل شوې جګړې د زغم توان نه لري او د يمن په څېر افغانستان دی چې د سخت غربت له امله یې ماشومان نور له مرګ سره مخ دي. په يمن کې د سږني کال ماشومان د لوږي او غربت له مخې مري، خو افغان ماشومان او لويان هر کال د غربت له امله د مرګ له ګواښ سره مخ وي چې سږ ژمی یې تر ټولو سخت د لوږي او غربت ژمی دى.
دا مهال په افغانستان کې دوه نيم ميليونه ماشومان د لوږې له امله د مرګ له ګواښ سره مخ دي او له بلې خوا پرې د ناټو عمومي منشي د جګړې د دوام پرېکړه د بروکسل په غونډه کې وکړه چې تر څو په افغانستان کې ناامني وي، د ناټو پوځونه به پاتې وي. له دې نه دا څرګنده شوه چې په افغانستان کې به غربت، لوږه او جګړه دوام لري.
