دهېواد د شخړې حل ، غيرصادقانه هڅو ناشونی کړی دی

 دکمونيستي رژيم  وروستي واکمن ډاکټر نجيب به په هره غونډه کې ويل، موږ سوله او امن غواړو ، خو د سولې او امن واک ورسره نه و . هغه څه چې د غونډو برخوالوته به يې اورول، ظاهرا به داسې برېښېدل چې ډاکټر نجيب په رښتيا د سولې غوښتونکی دی ؛ حال داچې له چا سره د سولې واک و ، هغه سوله نه غوښته . اوس هم هغه حال دی ؛ موجوده اداره چې مشري يې د ډاکټراشرف غني او عبدالله سره ده ، دوی دواړه ظاهرا په غونډو کې د نجيب په څېر دسولې غوښتنې کوي خو په خپله وينا کې يې صداقت نشته . کله چې د سولې خبرې پېل شي د ناکامه کولو لومړی  ثبوت يې دا وي ، چې بې صلاحيته پلاوی  مذاکراتو ته د طالبانو سره دناستې لپاره وليږي، چې لېږل شوی پلاوی به نه خپل صلاحيت لري او نه ورته د وينا لپاره څه په ګوته شوي وي . د مذاکراتو په دوام کې به هيڅ ونشي ، مذاکرات به بې پايلې تمام شي . بل د سولې او امن راوستلو غيرصادقانه عمل دا هم دی ، چې مذاکراتو ته په پلاوي کې داسې کسان شامل کړي چې د نه صلاحيت سره سره مقابل لوري ته دقانع کولو توان هم نه لري . افغان ولس په دې ښه پوهېږي چې دا يوه څرګنده غولوونکې هڅه ده او د سولي ته تږي ولس په سترګو کې خاورې اچول دي، چې دوی يو درځن اويا له درځنه زيات کسان پلاوي کې شامل کړي ، خو نه پکې د واک لرلو څرک وي او نه مقابل لوري ته دځواب ويلو ؛ بلکې هغه کسان به پلاوي کې شا مل وي چې مستقيما په جګړه کې لاس لري.

دفيليپين دولت او د « مورو ملي ډله » چې د مينداناو د ټاپو د مسلمانانو ډله ده ، د دوی ترمنځ څومره په صداقت سوله وشوه ؟ دې دواړو خواوو  په اصل کې دسولې لپاره رښتينې هڅې کولې ، هماغه وه چې  دسولې څرک يې په هېواد کې ښکاره شو. د فيليپيني دولت او اسلامپالو ترمنځ يوې سوله غوښتونکې ادارې چې د ” تماس نړيواله ډله ” يادېږي د دواړو خواوو ترمنځ يې منځګړتوب وکړ او دواړه خواوې يې دسولې او مذاکراتو لپاره سره کښېنولې . د تماس د نړېوالې ډلې د ادارې يوې غړې « اېما لېزلي » د فيليپين او د اسلامپالو مسلمانانو دسولې په اړه ويلي : د ۲۰۱۴زکال را په دېخوا تراوسه پورې د دواړو خواوو ترمنځ تر يولک زيات کسان په جګړو کې سره وژل شوي دي؛ خو اسلامپالو او فيليپين دولت چې په صداقت يې د روغې جوړې پلوي کوله. زموږ منځګړتوب ته يې په درنه سترګه وکتل . موږ دخپل باور له مخې د دواړو ترمنځ صادقانه هلې ځلې پېل کړي . دفيليپين او اسلامپالې ډلې ترمنځ يو ځلی په ۱۹۹ کې پېل خبرې ناکامه شوې اوس برتانيا، چاپان، ترکيې او سعودي څخه دتماس نړيوالې ډلې په منځګړتوب د دواړو خواوو، ترمنځ روغه جوړه وشوه . که څه هم دا روغه په ۲۲ پړاوونو کې وشوه خو د دې منګړې ډلې لوی رول دا و ، چې د خبرو لپاره يې دريمګړی هېواد ماليزيا غوره کړه او د دواړو خواوو څخه يې پنځه پنځه کسيز پلاوي چې دهرو پنځو کسانومشري به يو شخص کوله ، نظرونه واخيستل او د دواړو خواوو فيليپين دولت او اسلامپالو ترمنځ دسولې هوکړه لاس ليک شوه .

که په افغانستان کې موجوده اداره په رښتيا سوله  او امن غواړي ، نو په لومړي سر کې بايد يو داسې هېواد چې دافغانانو ، مذهب او کلتور سره نږدېوالی او شريکوالی ولري د سولې لپاره يې منځګړی غوره کړي . واکمن پلاوی دسولې خبروته وټاکي. طالبان هم د خپل هېواد د سلامتيا او د پرديو داشغال دخلاصون لپاره ورته اقدام وکړي نو که خدای کول افغانان به دسولې او امن ساه واخلي.