شهیده ناهید صاعد رحمة الله علیها
لیکنه : راشد – –
د ۱۳۵۹هـ ش د ثور په نهمه د سه شنبې په ورځ په کابل کې د نجونو مکتبونو يو پاڅون وکړ ، دا پاڅون د روسانو د اشغال او د هغوی د لاسپوڅي رژیم پر ضد وو ، پاڅون د کابل په کارته چار کې د رابعه بلخې او سوریا د نجونو له لېسو څخه پيل شو ، په همدې پاڅون کې ناهيد صاعد ، وجيهه خالقي چې د دې پاڅون مشرانې وې ، او ځينې نورې نجونې د خلقيانو او پرچميانو په ډزو په شهادت ورسېدلې .
د هغه وخت د ګوډاګيانو له لوري چې کله مسلح ځواکونو د دې لاريونکونکيو نجونو مخ ته ودرېدل ، نو په همدې مهال ناهيد صاعد خپل پړونی ( ټيکری ) راواخستلو او د ې ته مخامخ ولاړ د ګوډاګيانو عسکر قهار حزبي ته يې ور وغورځولو ورته ويل يې چې : ” تاسو د روسانو په مقابل کې د و طن دفاع ونکړه بلکه د هغوی خوا مو ونيوله ، نو زمونږ دا پړوني تاسو پر سر کړئ ، او توپک مو مونږ ته راکړئ چې د وطن دفاع پرې وکړو” . خو دغه بې غيرته افسر د دې خبرې په اورېدو سره د قهرمانې ناهيد او څو نورو نجونو لور ته مرمۍ اوويشتلې او بادارانو ته يې خپله غلامي ثابته کړه .
شهيده ناهيد صاعد رحمة الله عليها د سيد يوسف صاعد لور ، په ۱۳۳۹ هـ ش کې په کابل کې زېږېدلې وه ، له لومړنيو زدکړو وروسته “سوریا ” لېسې ته لاړه ، بيا يې خپلې زدکړې د”رابعه بلخی” په لېسه کې په مخ بېولې ، تردې چې د لېسې په وروستي کال چې ناهيد په دولسم ټولګي کې وه ، د ۱۳۵۹ د ثور په نهمه د سه شنبې په ورځ پداسې حال کې چې د اشغالګرو روسانو پرضد د لاريون مشري يې کوله ، د کابل په کارته چهار کې د ايمان پلورونکو په ګولۍ په شهادت ورسېدله .
ناهيد د ولس په زړونو کې ځای ونيولو ، اوس خو د هر خپلواکه شاعر د ټيکۍ سر دی ، تر دې چې د خپلواکۍ دشعر او ادب په اسمان کې له سپېڅلې ملالۍ سره څنګ پر څنګ ګرځي .
عبد الرحمن پژواک د دې په نوم ” ناهيد نامه ” د اشعارو يو ستر کتاب ليکلی , خو يو بل بيا د انګرېزانو او نورو دښمنانو د قانون پر اساس چې افغانانو ته د افتخار هېڅ يو مينار پاتې نشې يو مرموزه کرغېړن کوښښ کړی .
د ۱۳۷۰ په حوت کې د خليل الله عطايي ، د کوم شوم هدف په مرموزو ګوتو د “ناهید دختر یک ملت غیور” ترعنوان لاندې يو کتاب د امريکا په کاليفورنيا کې د “سفیون انسټنټ پرنټنګ ” له لوري چاپ شو ، د دوکتور اسد الله شعور له قوله : بیشتر ازینکه برای تقدیر از مقام ناهید باشد، بیشتر برای کوچک ساختن شخصیت او در اذهان عامه به طبع رسیده است که عملیست قبیح .
وجیهه خالقی :
وجيهه خالقي هم د کابل له قهرمانو نجونو څخه وه چې د نجونو په همدې پاڅون کې له ناهيد څخه يو څو شېبې مخکې شهيده شوه . هغه چې د رابعه بلخي د لېسې د لسم ټولګي زدکونکې وه ، په ۱۳۴۱ کې دنيا ته راغلې وه ، د دې پاڅون په ورځ يې د خپلې لېسې د نجونو د دوهمې ډلې مشري په غاړه وه ، او حبيبيه ليسې سره نږدې په شهادت ورسېدله . روح دې ښاد وي . او رب دې د دوی او ټولو شهيدانو شهادت قبول کړي .
