د دولت موجوده اداره چې د ملي حکومت د دواړو ډاکټرانو د خپلو کمپاينونو په دوران کې ولس ته په هره غونډه کې دافغانستان دامن د لومړيتوب وروسته د کډوالو د راستنيدا او بيا وروسته د يوه داسې نظام چې اقتصاد ، زراعت ، تعليم او نورو برخو کې هېواد په اقتصادي لحاظ په خپلو پښو ودروي ټټرونه وهلي وو؛ خو تر۹ مياشتو پورې يې د حکومت په جوړښت اتفاق نه راته او دا دی تر کال زياتې مودې پورې يې نه په افغانستان کې امنيت راوست او نه يې افغان کډوالوته خپل هېواد ته د راستنيدو زمينه برابره کړه. هره اونۍ د خليج او په ځانګړې توګه د يونان او ترکيې په اوبو کې په پټه توګه د کډوالو د بېړيو د چپه کيدو او پکې د افغانانو د مرګ خبر ورکول کېږي . د ملګرو ملتونو د سازمان د کډوالو ادارې خو څو وارې پر اروپايي هېوادونو غږ کړی دی ، چې په غربي هېوادونو کې پنا اخيستونکو ته د ژوند تېرولو زمينه برابره کړي ؛ خو د سوريې کډوال چې د اروپا يي هېوادونو په لورې مخه کړې ده ، دومره زيات شوي دي چې اروپايي هېوادونه نور د افغانانو د منلو څخه انکاري شوي. په سږني کال کې اروپايي هېوادونوته په تلوونکو کډوالو کې پنځم شخص افغان دی چې که څه هم دغربي هېوادونو له انکاره خبر شوي دي خو بيا هم په خپل هېواد کې د نا امنيو له امله اروپاته د تګ سختيو ته يې غاړه ايښې ده. په ګاونډيو هېوادونو کې يې هم افغان کډوال د پخوا په نسبت د زياتو ستونزو سره مخ دي؛ لومړۍ ستونزه چې افغان کډوالو ته په ګاونډيو هېوادونو کې وه هغه ايران و ، چې په درې زره افغان کډوالو باندې يې د بېلا بېلو جرمونو په نامه د اعدام امر صادر کړ. دغه رنګ په پاکستان کې بېلابېلو سېمو کې د افغان کډوالو سره هغه سلوک اوس نه کېږي کوم چې د ۱۹۹۶ ز د مخه کېده . د ايران او پاکستان د دواړو ګاونډيو هېوادونو د لوړ پوړو چارواکو او په ځانګړې توګه د کډوالو د وزارتونو مشرانو د ليدلو لپاره افغان دولت دکډوالو د چارو وزير سيد حسين عالمي بلخي د پلاوو په مشرۍ ايران او پاکستان ته ولېږه او د بلخي په وينا دواړو هېوادونو ورسره د افغان کډوالو د ستونزو په راکمولو کې ژمنې وکړې اما د کډوالو په وينا ستونزې يې په خپل حال پاتې دي. د ولسمشر اشرف غني مېرمنې رولا غني د افغان کډوالو د ژوند او ستونزو د حل په اړه اروپآيي هېوادونو ته سفرونه وکړل خو هېڅ نتيجه يې ورنکړه.
په کابل کې د ملګرو ملتونو د کډوالو د سازمان استازې« مايا امرتونګا » خبري غونډه کې ويلي: ۷۰ سلنه کډوال اروپا ته د يونان له لارې روان دي او هره اونۍ له افغانستان څخه د اروپا په لورې د کډوالو په شمېر کې زياتوالی راځي. دکډوالو وزير چې وايي په روان ميلادي کال کې تر۶۰۰۰زرو پورې کډوال افغانستان ته راستانه شوي چې دا دخپل وزارت لاس ته راوړنه بولي ؛ خو دوی ناخبره دي چې تر ۱۰۰۰۰ سل زرو زيات افغان ځوانان د اروپايي هېوادونو له لارې له افغانستانه وتلي دي. عالمي بلخي دا هم ويلي چې تر۲۰۱۷ز پورې د ملګرو ملتونو لخوا ورسره د۵۵۳ ميليونو ډالرو ژمنه د افغان کډوالو لپاره شوې ده خو هغه کډوال چې افغانستان ته راستانه شوي تراوسه ورسره هېڅ مرسته نه ده شوې او دولت هم اعتراف وکړ چې کډوالو سره د ستونزو په حل کې ناکام شوی.
