کابل ټکی کام ۱۰/ وږی
راپور قدرت الله حسین
د اسيا په غوره ليګ سياليو کې نن سه شنبه د افغانستان د ۱۹ کلنو ملي لوبډلې د سعودي عربستان لوبډلې ته ستره ماتې ورکړه.
يادې سيالۍ د ماليزيا په پايتخت کوالالمپور کې ترسره کېږي.
د ننۍ پنځوس اوريزې لوبې پچه د عربستان لوبډلې ګټلې وه او د لومړۍ توپوهنې پرېکړه يې وکړه.
سعودي په ۳۹ اورونو کې ۱۵۷ منډې جوړې کړې او ټول لوبغاړي يې وسوځېدل.
د افغانستان لوبډله وتوانېده چې ياد هدف په ۱۷ اورونو کې پوره کړي او يوازې ۲ لوبغاړي له لاسه ورکړي.
د لوبې غوره لوبغاړی حضرت الله ټاکل شوی، چې ناسوځېدلی پاتې و او ۹۸ منډې يې جوړې کړې وې.
د افغانستان لوبډلې له دې وړاندې په يادو سياليو کې عربي اماراتو، نيپال او کويت ته هم ماتې ورکړې وه.
