راپور تاژ: فرید افغان
(کابل ټکی کام ۱۳۹۷ غبرګولی ۱۷)
په داسې حال کې چې د غزني د سقوط په هکله په ولسي جرګه کې د دې ولایت د استازو اندېښنې ورځ تر بلې په زیاتیدو دي ، په یاد ولایت کې یوځل بیا نښتو زور اخیستی دی .
چارواکی وایی، چې د اندړو په محاصره ولسوالۍ باندې تیره شپه طالبانو یوځل بیا تهاجمي برید کړی چې په خبره یې یاد تعرضي برید پرشا تمبول شوی خو سربازانو ته هم مرګ ژوبله اوښتې.
چارواکي وایي ، په یاده ولسوالۍ کې امنیتي ځواکونه د خوراکي توکو له سخت کمښت سره لاس او ګریوان دي او که مرسته یې ونه شي ښایي ژر خپلې پوستې او امنیتي مراکز د لوږې له امله هم خوشي کړي.
چارواکي وایي تېره شپه یې د ګیلان، مقر، اندړو ، قرباغ او خواجه عمر ولسوالیو کې د طالبانو منظم بریدونه پر شا تمبولي دي او ۲۵ وسلوالو طالبانو ته یې مرګ ژوبله اړولې.
خو د دې ولایت د ولایتي شورا غړی نصیر احمد فقیري بیا د چارواکو دا ادعا نه مني او زیاتوي چې د قره باغ ولسوالۍ اړوند د جنګلک سیمه کې لا هم خونړۍ نښته دوام لري . فقیري وایي؛ که سیمې ته ژر تر ژره هوایي ملاتړ ونه رسیږي یاده سیمه به په ټولیز ډول د طالبانو لاس ته ولویږي.
په همدې مهال طالب ویاند ذبیح الله مجاهد په یوه خبرپاڼه کې ویلي چې تیره شپه یې د یادې ولسوالۍ په خالوخېلو سیمه کې د پولیسو یوه مهمه قرارګاه نیولې او ۱۱ تنه پولیس یې وژلي. طالبانو ویلي چې ځای ته په یوه بله نږدې پرته سیمه کې یې هم په یوه پوسته کې ۵ عسکرو ته مرګ ژوبله اړولې.
بل پلو د غزني _پکتیکا لار لا هم د دولتي ځواکونو پر مخ تړلې طالبان وایي؛ د لارې په اوږدو کې د بوړ، عالموالو، بدوانو، ششخیلو او امین کلا سیمو کې یې د لارې د خلاصون په موخه د دولتي ځواکونو ټول تعرضونه په شا تمبول شوي، ۴ ټانګونه یې ویجاړ او ۲۳ ځواکونو ته مرګ ژوبله اوښتې.
د دې ترڅنګ طالبانو ادعا کړې چې نن ماسپښین یوه بجه یې غزني مرکز اړوند توحید آباد سیمه کې پر هغه قرارګاه توغندویز بریدونه کړي چې په کې د غزني نوی والي معرفي کیده او پر مهال یې بهرنیانو هم ګډون درلود.
طالبانو ویلي؛ غونډه د بریدونو له امله ګډه وډه شوه او ټول برخوال ترې وتښتیدل.
د غزني عمومي وضعیت د خلکو له آنده
ځایي خلک وایي چې د غزني عمومي وضعیت تر ډېره د طالبانو تر واکه لاندې ده، له ولسوالیو نیولې بیا د ښار تر منځه پریکړې، خپلمنځي شخړې په مکاتبو او روغتونونو نظارت او ګڼې نورې چارې طالبان کنترولوي.
دولتي اداره چې د ۲۰۳ تندر قول اردو او د کمانډو ځواکونو په ګډون د بهرنیو ځواکونو قوي ملاتړ له ځانه سره لري یواځې د ولایت او امنیې قوماندانۍ تر څنډو محدوده واکمني لري.
د غزني بازار هم د طالبانو تر پوښښ خالي نه دی او په هره شیبه کې هغوی کولی شي خپل اهداف په نښه او ځان خپلې موخې ته ورسوي
په غزني کې تازه بدلونونه
د وضعیت په اوښتون او د طالبانو تر خوځښتونو وروسته د غزني په سیمییزه حکومتولۍ کې هم بدلونونه راغلل، د ملي امنیت مدیر له کندهاره د حوزې یو آمر ورلیږل شوی او والي یې چې د بې کفایتي او ګڼو نورو تورنو سره مخ و، له دندې ګوښه او پرځای یې د کونړ والي وحید الله کلیمزی ورغلی .
د غزني خلک څه وایي؟
د غزني خلک عموماً د سرتاسري امن غوښتونکي دي هغوی که څه هم د دولتي ځواکونو له خپلسریو سرټکوي خو بیا هم غواړي په سیمه کې ولسواکه امن رامنځته او خلک له ناخوالو وژغورل شي.
ولې د طالبانو پرمختګونه
غزني د هغو ولایتونو له ډلې دی چې ولسونه یې تر ډېره د طالبانو ملاتړ کوي ډېری د طالبانو په سپېڅلتیا او ځینې نور بیا د ځایي حکومتولي نه د تنګ راتلو له کبله د طالبانو مالي او ځاني ملاتړ ته رادانګلي دي.
د مالیې پخوانی وزیر او په پاکستان کې افغان سفیر عمر زاخیلوال وایي، د هیواد لویه کچه وسلوال مخالفین خپله د حکومت خپلسریو زیږولي چې له همدې امله زیاترو ولسونو د حکومت پرضد له طالبانو سره لاس یو کړی دی.
