د افغانستان په ټولو ولاياتو کې د تېر تاريخ له شواهدو د يرغلګرو په خلاف پولادي سنګرونه شته، چې اوس هم د خپل تېر تاريخ په کړنو ، چې انګريزانو او روسانو ته يې پکې ماتې ورکړې يادېږي او تر راتلونکي نسل په نسل به د افغانستان دغازيانو ، مجاهدينو او يرغلګرو ته ماتې ورکوونکو ځوانانو تاريخ ژوندی وي . د نورو ولاياتو ترڅنګ په ننګرهار کې د روسانو د ماتې او د هډوکو د ماتولو سنګرونه شته ، چې يوه توره بوړه د جهادي مرکز تاريخي نوم او بل يې د ننګرهار جلال اباد ښار ختيځ لورې ته د ثمرخېلو غر دی، چې مجاهدينو د روسانو پرخلاف له تورې بوړې او د کمونيستي مليشو پرخلاف د ثمر خيلو دغره خپلو بريدونو ته دوام ورکاوه. هغه توره بوړه چې له نامه يې يوازې روسان نه ؛ بلکې امريکايان او د امريکا سره پوځي لنډغر ملګري هېوادونه چې د ناټو په چوکاټ کې د افغان ولس پر سر جګړې ته دوام ورکوي وېره لري. او په دې يې اعتراض کی دی چې توره بوړه د مجاهدينو يونه ماتېدونکی سنګر و.
د ننګرهار څخه رارسيدلو راپورونو څخه جوتېږي ، چې په چپرهار ولسوالۍ کې د څلور ورځو جګړو وروسته چې طالبان سره يې وکړه او پکې دهسکې مېنې ،اچين ، او بټې کوټ څخه هم داعش وسلوال راغوښتي وو اوس غوړاي د پچيراوګام د جګړو وروسته ځان تورې بوړې ته ورسوي .دا چې داعش ډله له څرنګه تورې بوړې ته رسېږي ترشا يې رازونه موجود دي . يو داچې کله په چپرهار ولسوالۍ کې د داعش ا و طالبانو ترمنځ جګړه روانه وه د امريکا بې پېلوټه الوتکې د طالبانو دوه ډاډسنې له هوا څخه وويشتې خو د داعش وسلوال چې ډلې ډلې به ګرځيدل او سپکې درنې وسلې ورسره وي د امريکا بې پېلوټه الوتکې ته نه ښکاريدل.
زمونږ د کلونو کلونو د جګړو تجربې ښکاره کوي هغه څه چې امريکايې پرخلاف زيات تبليغات کوي ځينې کارونو کې بيا همدا امريکا سلا لري چې ديوې خوايې پرخلاف تبليغ کوي او د بلې خوا ورته د فعاليت زمينه برابره وي. د شناندو په اند امریکا خپله زمينه برابروي چې د داعش ډله تورې بوړې ته ورورسوي . که څه هم دکورنيو چارو او دفاع وزارت وياندانو خبرې رسنيوته ويلي چې په ننګرهار کې به د داعش پرخلاف ګړندي عمليات پېل کړي ؛ خو فکر کوم تر څوچې دواړه وزارتونه په خپلو کې دعملياتو مشورې کوي داعش به ځان تورې بوړې ته رسولی وي چې دا زيری جنرال کمبل هم ورکړی دی .
د افغانستان د څلورو اهمو ولاياتو څخه چې د جګړې مرکزيت پکې ساتل کېږي يو د ننګرهار د تورې بوړې مرکز دی که دا مرکز داعش ته په لاس ورغی نو بيا ګرانه ده چې دولتي ځواکونه د تورې بوړې ترخوا هم تېر شي او نورو ولاياتو ته به دتورې بوړې څخه جنګي اکمالات روان وي.
