تبصره
امريکا چې پر افغانستان يرغل وکړ او د ناټو له څلويښتو زياتو هېوادونو پوځونه يې په يرغل کې له ځان سره ملګري کړل، دا ټول د دې لپاره چې په لیرې پرتو سيمو کې د افغانستان معدني ذخيرې په خپلو پوځي مرکزونو کې د برمو په وسيله ترلاسه کړي، خو اصلي موخې ته لا نه دې رسيدلې.
د امريکا لپاره افغانستان مهم دی، خو دومره هم نه چې د راايستل شويو يورانيمو څو چنده قيمت دې جګړو کې پوره کړي.
امريکا په افغانستان کې د سيمې د ښکار لپاره پاتې کيږي او دا دومره بې خرته تاوانونه د افغانستان پر سر نه، بلکې د منځنۍ اسيا لپاره کوي؛ ځکه په افغانستان کې د خپلو پوځونو په پاتې کيدو ټينګار کوي.
په افغانستان کې اوسمهال هيڅ نشته. څه معدني ذخيرې چې وې، له يورانيمو نيولې تر زمرودو پورې يې ټولې لوټ کړې. اوس په افغانستان کې د نورو د ښکار لپاره اډې جوړوي، اوس هغه وخت نه دى چې امريکا به د افغانستان د اشغال لپاره د پاکستان هرې غوښتنې ته د هو سر خوځاوه، اوس هم همغه پاکستان دى، خو کله چې امريکا پر افغانستان د پوځي شتون خيټه واچوله، له پاکسانه يې مخ واړاوه او د مرستو بندولو لپاره ورته يوه او بله پلمه ګوري.
امريکا له طالبانو سره د سولې په نوم خپلو پوځونو ته ځای ګوري، داسې ځای چې د افغانستان له بامه د منځنۍ اسيا ښکار وکړي. که په دې مسئله څوک ځان پوره پوهول غواړي، د تير کال په لومړيو کې دې د ټرمپ لخوا د افغانستان او منځنۍ اسيا لپاره له نوې پاليسۍ ځان خبر کړي.
اشرف غني لګيا دی په ارګ کې غونډې کوي او له طالبانو سره مذاکراتي ټيم ټاکي، کله يوه او کله بله څيره د مذاکراتو لپاره بدلوي. عمر داودزى به څه وکړي؟ څه يې په وس پوره دي او څه واک لري؟
امريکا په افغانستان کې تلپاتې سوله نه بلکې افغان ولس تلپاتې غلام او يا يې تل په هېواد کې د جګړې دوام غواړي، همدا اوس هم امريکا په افغانستان کې د جګړې د دوام لپاره په افغان حکومت علاوه نورو خواوو باندې کار کوي، چې د طالبانو او بيلابيلو ګوندونو تر منځ د خپلمنځيو جګړو اور بل کړي، څو افغان ولس او طالبان دې ته اړ کړي چې د امريکا په خوښه سولې ته غاړه کيږدي.
د کمونستي نظام له نسکوريدا وروسته امريکا شپږ کاله د جهادي ګوندونو د خپل منځيو ډغرو سیل کاوه. افغان ولس يې د جهادي ګوندونو د مشرانو له کړونو او د هغوی له جهاده بيزاره کړ. امريکا هغه څه غواړي چې په افغانستان کې يې يو افغان هم منلو ته غاړه نږدي، خو د روان حالت په دوام به همدا افغانان، چې نن د امريکا په سوله باور نه لري، دې ته اړ کړي چې سره له بې باورۍ ورته غاړه کيږدي او امريکا د افغانستان له بامه په اسيا کې خپلو اهدافو ته ځان ورسوي.
امريکا چې د سولې په نوم څه کوي، د جګړې په نوم يې هم کوي او چې د جګړې په نوم يې کوي په سوله کې يې تر هغې زيات کوي. افغانان يې د نا امنيو او له القاعده څخه د خطر په نوم رانيولي دي، خو سعودي عربستان يې د بشپړ امنيت په درلودلو سره له ايرانه ډاروي. امريکا عربي چارواکو ته وايي چې که د امريکا مرسته درسره نه وي، ماشومان به يې د عربي پر ځای په ښوونځيو کې فارسي ووايي، معنی دا چې ايران به پر سعودي قابض شي او دا امريکا ده چې د ايران مخه يې نيولې ده.
امريکا له افغاستانه په دې لاس نه اخلي چې د ميلياردونو ډالرو په لګښتونو يې خپل اهداف لا نه دي تر لاسه کړي او غواړي په افغانستان کې تلپاتې پوځي شتون ولري. هغه وخت به امريکا له افغانستانه لاس اخلي چې ټول افغان ولس لکه د روسانو پر خلاف چې راپورته شول، د امريکا پر خلاف هم راپورته او پوځونه يې د ګروموف په څير تيښتې ته اړ کړي.
