سرلیکنه
په تاسف سره چې د اسلامي هیوادونو د نه یو موټي کیدا په نتیجه کې د اسلام او اسلامي خاورې دښمنانو د دغې خاورې د ایل کولو لپاره دا سې پلانونه جوړ کړي چې یو په بل پسی عملي کوي.
تیره ورځ د امریکا ولسمشر ډونالډ ټرمپ د بیت المقدس ښار د اسرائیلو د پلازمینې په توګه د په رسمیت پیژندلو وروسته دادی د جولان لوړې هم د اسرائیلو د خاورې په توګه په رسمیت وپیژندې او اسلامي هیوادونه په تیره بیا عربي هیوادونه يې پر وړاندې یواځې په غندلو بسنه کوي.
د جولان لوړې چې د نږدې ۵۰ کلونو راهیسې اسرائیلو له سوریې ولکه کړي په دې پنځوسو کلونو کې که اسلامي هیوادونو یې د ژغورنې لپاره اتحاد کړی وای نن به دا دوهم قدم نه پورته کیده او په رسمیت به یې نه پیژندې، اوس هم که اسلامي هیوادونه یواځې په غندنه اکتفا ونکړي بلکې عملا یې پر وړاندې اقدام وکړي کولای شي دغه لوړې بیرته د اسلامي امت د ارضي تمامیت جز وګرځوي، خو که اسلامي هیوادونه د بیت المقدس د قضیې په څیر په دې موضوع کې هم یواځې پر غندنه اکتفا وکړي نو د اسلامي نړۍ د خاورې پر وړاندې دې دې د اسلامي خاورې د دښمنانو بل ورته ګام ته هم انتظار اوباسي او په تدریجی توګه دې د ټولې اسلامي نړۍ خاورې د لاسه ورکولو په اړه شک نه کوي.
د تعجب ځای دی چې د ټرمپ د دې پریکړې په اړه یواځې اسرائیلو د تایید ټاپه ووهله او له روسیې نیولې تر ایران او ټولو اسلامي هیوادونو په تیره بیا سعودي عربستان، کویت، قطر، سوریه او بحرین ټولو دغه پریکړه په متفقانه ډول غندلې ده. سره له دې چې ایران او قطر تل یوې خواته او نور عربي هیوادونو بل اړخ نیولی، یعنی عربي هیوادونو د امریکا پر خوا ولاړ دی او قطر او ایران د امریکا پر خلاف، خو په دې موضوع کې یې سره موقف یو کړی، که په دې هکله عملي اقدام هم سره یو کړي نو ناشونی نده چې دغه قضیه به خپله کړي.
خو ډیره ناممکنه ښکاري چې اسلامي هیوادونه دې د امریکا او اسرائیلو پر خلاف عملي ګام باندې لاس پورې کړي چې د خورا تاسف ځای دی.
