کرکټ: سبا د افغانستان دوهمه تمريناتي لوبه انګلستان سره ده
(کابل ټکی کام، ۱۳۹۸، غبرګولی ۵)
ټاکل شوې چې سبا د دوشنبې په ورځ د افغانستان کرکټ ملي لوبډله له انګلستان سره خپله دوهمه تمريناتي لوبه ترسره کړي.
دا چې د مئ مياشتې په ديرشمه نيټه د کرکټ د نړيوال جام سيالۍ پيل کيږي نو په دغه جام کې برخه اخيستونکې لوبډلې بايد د جام سياليو له پيليدو مخکې دوه تمريناتي لوبې وکړي.
افغانستان هم خپله لومړنۍ تمریناتي لوبه د تيرې جمعې په ورځ د پاکستان له کرکټ ملي لوبډلې سره وه چې د درېيو ويکټو په توپير يې پاکستان مات کړ او بريا يې په خپل نوم کړه.
د انګلستان او افغانستان کرکټ لوبډلو سبانۍ سيالي د لندن کېنينګټن سيمې په او وال لوبغالي کې ترسره کيږي.
د يادونې ده، چې د افغانستان کرکټ ملي لوبډله د نړيوال جام په سياليو کې خپله لومړۍ لوبه د جون په لومړۍ نيټه د اسټراليا لوبډلې سره لري.
