تاجکستان د ۱۳۰۰۰ مسلمانانو ږيرې، «افراطیت ته د پای ټکي اېښودو» تر نامه لاندې خرېیلي دي.

کابل ټکی کام (پنجشنبه ۰۱ سلواغه ۱۳۹۴ ل) فرید احمد
په تاجکستان کې پولیسو د ۱۳۰۰۰ مسلمانانو ږيرې تر دې نامه لاندې خرېیلي دي چې په ملک کې افراطیت ته د پای ټکی کيږدي، او د تېر کال راپديخوا یې ۱۶۰ هغه دکانونه تړلي دي چې اسلامي جامې یې خرڅولې.
د تاجکستان د جنوب غربي علاقې د پولیسو مشر بهرام شریفزاده په یوه مطبوعاتي کنفرانس کې ویلي دي چې ۱۷۰۰ ښځې یې دې ته هڅولي دي چې نور اسلامي حجاب وانه غوندي.
تاجکستان په منځنۍ اسیا کې پروت هېواد دی چې په قاطع اکثریت مسلمانان پکې اوسیږي.
دغه هڅې د تاجکستان سیکیولر مشر رحمانوف لخوا پيل شوي دي ترڅو د ګاونډي هېواد افغانستان څخه ورغلی دود او دستور له منځه یوسي او تر دې نامه لاندې چې پردی رواج ختموي، پر مسلمانانو حج ته تلل هم بند کړي دي.
یو غیر رسمي تخمین وايي چې په سوریه کې له ۲۰۰۰۰ څخه زیات تاجکستانیان جنګیږي، خو چې دا په لوړ تعداد اسلامپال به د تاجکستان روان حکومت سره څرنګه برخورد وکړي، په اړه یې اوس څه نشو ویلای.
تېره هفته د تاجکستان پارلمان یو قانون پاس کړ چې نور دې په تاجکستان کې په اسلامي نومونو هم بندیز ولګول شي.
رحمانوف پدې اند دی چې که چېرې اسلامي اعمال د خلکو له لوري پرځای شي نو د تاجکستان امن ته به خطره پيښه کړي.
د تېر کال په سپټمبر میاشت کې د تاجکستان پارلمان په ملک کې په یوازیني اسلامي تنظیم چې په تاجکستان کې یې سیاسي فعالیت پر مخ وړلو بندیز ولګولو.
رحمانوف له ۱۹۹۴ م کال راپدېخوا په تاجکستان باندې حکومت کوي او تمه کیږي چې د نوموړي د ولسمشرۍ موده به په ۲۰۲۰ م کال کې پای ته ورسیږي.
په تېر ډيسمبر میاشت کې د تاجکستان سترې محکمې ښاغلی رحمانوف او کورنۍ یې د همېشه لپاره له قانون څخه پورته اعلان کړل او هغه یې د تاجکستان د یوالي او سولې سمبول وباله، د عمر تر آخر پورې به نه پر ده او نه هم دده پر کورنۍ باندې کوم تور پورې کیږي.
د تاجکستان 7.1 ملیون خلک د روسیې څخه د آزادي اخیستو وروسته له غربت سره لاس او ګرېوان دي او د تاجکستان زیاتره خلک په روسیه کې تجارتونه کوي.