«سرليکنه »
دکندوز په ښار کې چې د ناټو هوايي ځواکونو ددولت د نظامي چارواکو په مشوره او غوښتنه په يوه روغتون بمباري وکړه نه يوازي دا چې د هېواد بېلابېلو علماوو، سياسي او تنظيمي مشرانو په دې نيوکې وکړې د ملګرو ملتونو د بشري حقوقو د سازمان لخوا هم د ناټو او دولتي پوځونه په سرغړونه تورن کړل شول .
تېره اونۍ چې د وردګو ولايت په تنګي سيدان سيمه کې دولتي ځواکونو پر يوه مرستندوی روغتون بريد وکړ او پکې يې د روغتون يو ساتونکی او دوه تنه ناروغان په شهادت ورسول ، دولس له کرکې او نفرت سره مخ شول.
دهېواد دولتي ځواکونو دنده دولس د سر او مال ساتنه ده ؛ خو د ملي يوالي حکومت امنيتي ځواکونه له ولسي ګړو ژوند اخلي.
نه يواځې دا چې په کليو او بانډو بريدونه کوي ؛ په روغتون کې مريضان هم وژني.
د وردګو په ولايت کې دسويډن دکميټې دروغتون مشر يور ګن هو لمتروم ويلي چې د شپې دوه بجې خواوشا په دولتي نظامي يونيفورم سمبال وسله والو په روغتون بريد وکړ او د ملګرو ملتونو داصولو پر خلاف يې په روغتون کې مريضان هم ووژل.
هو لمترم وويل: په روغتون کې هر مريض حق لري ، چې د انساني کرامت په خوندي ساتلو سره يې درملنه وشي ،دې دولتي پوځواکونو کاملا د بشري حقوقو څخه سرغړونه کړې ده.
د وردګو ولايتي چارواکو د سويډن دکميټي پر روغتون له بريده انکارکړی دی ، ويلي يې دي، چې پر روغتون له مرکز ( کابل) څخه ځانګړي ځواکونه راغلي او بريد يې پرې کړی؛ خو د وردګو ولايت څخه راپور ورکړل شوی دی، چې د سويډن کميټې پر روغتون داخلي او بهرنيو ګډو ځواکونو بريد کړی دی .
دا د دولتي اوبهرنيو ځواکونو بل دويم بريد دی چې د کندوز له روغتون ورسته يې د وردګو په ولايت کې په مرستندوی روغتون وکړ، چې د وردګو ولا يت اوسيدونکو انديښنې يې د امنيت له پلوه زياتې کړي دي .
له يوه پلوه د بهرنيو چارو وزارت مرستيال حکمت کرزي له ملګرو ملتونو څخه غوښتنه کړې ده ، چې دافغانستان نوم له بدنامه ليست څخه وباسي ،چې په افغانستان کې دشوې سروې له مخې دجګړ و په ليکو او پوځ کې له ماشومانو کار اخلي .
اوس که د ملګرو ملتونو سروې په حقيقت بيا نوې سروې وکړي؛ نو دولتي ځواکونه په دوو ، بدنامو لېستونو کې راتلای شي؛ يودا چې د جګړو په ليکو کې له ماشومانو چې په نړيواله کچه يې منع اعلان شوې کار اخلي او له بلې خوا به ملکي وګړ چې په روغتون يې د درملنې لاندې وي وژنه به يې په جنګي جنايتکارانو کې شامل کړي.
د مخه به د کورنيو او دفاع چارو وزارتونو د ملګرو ملتونو لخوا په افغانستان کې د ملکي وګړو اعلان شوې پړه په وسله والو مخالفينو اړو له ؛ خو دا ځل د ملګرو ملتونو د بشر د حقوقو سازمان مسقيما دولتي ځواکونو ته دبشر له حقوقو د سر غړونې ګوته نيولې ده.
