ع.اسدخیل
د افغانستان د سولې عالي شورا وایي، افغان حکومت د پوځي لارې د وسله والو مخالفانو په له منځه وړلو سره په دغه هیواد کې سوله نه شي ټینګولی نو باید روانه لانجه د خبرو له لارې حل شي، په داسې حال کې چې افغان حکومت او ولسمشر اشرف غني په خپله هم، د هغو وسله والو ډلو پر وړاندې، چې د سولې مخامخ خبرو ته نه حاضریږي، د جګړې پر دوام ټینګار کوي، خو د افغانستان د سولې عالي شورا وايي، چې په اوس وخت کې افغان حکومت په یوازې سر له وسله والو ډلو سره د مقابلې توان نه لري. د دې شورا د دارالانشاء رئیس محمد ایوب رفیقي امریکا غږ ته وویل، د جګړې له لارې هیڅکله افغانستان سولې او ثبات ته رسیدلی نشي او زیاته یې کړه چې: د سولې عالي شورا به په نورو هغو لاچارو غور وکړي، چې له مخې یې په افغانستان کې د سولې ټينګیدو ته لار هواره شي.
هغه د افغان حکومت او وسله والو طالبانو تر منځ تیرو جګړو ته په اشارې سره وویل:
“د کندوز د سقوط پر مهال که د خارجیانو بمبارۍ نه وی نو دا د افغانستان حکومت په توانمندۍ کې نه وه چې د کندز د سقوط مخه ونیسي او اوس هم موږ په هلمند کې د بعضې حوادثو شاهدان یو، د افغانستان په حکومت کې دا توانمندي اوس موږ عملاً نه وینو چې دوی دې وکولای شي دغسې یو جنجال مهار کړي. موږ بیا په دې باندې تاکید کوو چې جنګ د حل لاره نه ده، د سولې عالي شورا یقیناً نورې لارې چارې باید ولټوي، چې د سولې خبرې بې له جنګه یوې نتیجې ته ورسیږي.”
د سولې عالي شورا د دارالانشاء رئیس وايي، د وسله والو مخالفینو لویه برخه، په افغانستان کې د اداري فساد، له سیاسي نظام څخه د خلکو ناخوښي او په حکومت کې د سولې په تړاو د نظر یووالي نشتون له امله، وسله والې جګړې ته دوام ورکوي.
ښاغلي رفیقي وویل، که چیرې افغان حکومت ټولو خلکو تته یو ډول خدمتونه وړاندې کړي نو د وسله والو مخالفینو لویه برخه به له افغان حکومت سره له جګړې لاس واخلي.
دغه راز، د سولې عالي شورا د دارالانشاء رئیس د اسلامي حزب له درې کسیزه پلاوي سره، د سولې مخامخ خبرې مهمې وبللې او ویې ویل، دواړه غاړې به په راتلونکې اونۍ کې دویمه غونډه ترسره کړي.
هغه وویل “په جزئیاتو باندې موږ هغو غوښتنو ته نه یو تللي، خو یو مسئله چې ډيره مهمه ده چې په اولو غوښتونو کې به وي، هغه له تور لېست څخه د حکمتیار صاحب یا د بعضې کړیو چې د حزب اسلامي په چوکاټ کې په تور لېست کې شامل شوي دي ایستل دي، ، نو زه فکر کوم چې د مذاکراتو اول اړخ به له هغه ځایه څخه شروع شي.”
په همدې حال کې د اسلامي جمعیت ګوند د یوې خبرپاڼې په خپرواي، د سولې په خبرو کې د ګلبدین حکمتیار په مشرۍ د اسلامي حزب د ګډون هرکلی کړی.
د اسلامي حزب درې کسیزه پلاوی، چې دا مهال په کابل کې دی، تیره اونۍ له افغان حکومت سره د سولې مخامخ خبرې پیل کړې.
د حکمتیار په مشرۍ د اسلامي حزب پلاوي، د پخواني ولسمشر حامد کرزي د واکمنۍ پر مهال هم څو وارې کابل ته تللی او راغلي وو او د افغان حکومت له چارواکو او د سولې له عالي شورا سره یې خبرې کړې وې، خو دغو خبرو کومې مثبتې پایلې نه درلودې.
