تبصره
په ۱۹۸۲م کال کې د عراق سفاک، د قدرت غصب کوونکي او زورواکي مشر صدام حسین پر خلاف هغه مهال کردان راوپاریدل چې پر خپل مظلوم ملت یې ظلم او زیاتی نور اوج ته رسیدلی و. کردان په عراق کې کابو درې میلونه نفوس لري؛ کردانو د خپلواک کردستان لپاره د صدام پرخلاف مبارزه پیل کړه او صدام ته یې سرخوږی جوړ کړ. تر څه وخته کردان د صدام پر خلاف وجنګیدل خو هغه وخت د صدام حکومت ډیر غښتلی و.
په امریکا کې د وخت جمهور رئیس ډونالد ریګن صدام ته د کردانو د ځپلو لپاره کیمیاوي مواد ورکړل او په همغه کال صدام، په عراق کې د ایران پولې ته څیرمه د حلبچه ښار پر ملکي ښاریانو باندې دغه کیمیاوي مواد استعمال کړل چې د ښځو او ماشومانوپه ګډون یې نږدې پنځه زره ملکي کردان په ډیره وحشیانه توګه ووژل.
په دویم ځل مظلومو او مقهورو عراقیانو د صدام پرخلاف یوه ناکامه کودتا ترسره کړه خو د صدام حکومت یې ړنګ نه کړای شو، صدام د خپلو زومانو په شمول د کودتاګرو نږدې ۷۲ تنه مشران اعدام کړل.
امریکا صدام د کیمیاوي موادو په استعمال او د ۵۰۰۰ کردانو په وژلو تورن کړ، ورپسې صدام هیڅ بې هیڅه پر کویت یرغل یوړ، کویت یې ونیو، بې شمیره بې ګناه خلک یې په خپلو وینو کې ولړل ورپسې یې د سعودي عربستان پر ظهران ښار یرغل وکړ او ځواکونه یې دغه ښار ته ننوتل. په دې وخت کې د کویت او سعودي عربستان مشرتابه له امریکا نه مرسته وغوښته، امریکا د کویت د خلاصون لپاره پر عراق پوځي یرغل وکړ کویت یې د صدام له منګولو وژغورلو او عراقي فوځیان یې له خاورو سره برابر کړل او پاتې یې مجبور کړل چې د کویت او سعودي له خاورې پښې سپکې کړي، ورپسې امریکا صدام د پنځه زره کردانو او ۷۲ کودتاګر مشرانو د وژلو په تور تورن او بالآخره د عراق د محکمې لخوا اعدام کړای شو.
له ۲۰۱۱ میلادی کال راپدېخوا په سوریه کې د بشارالاسد د ظالم او بې دینه حکومت پر خلاف ملت پاڅون وکړ، پاڅون کوونکو شپږ وسله وال ګوندونه منظم کړل په ۲۰۱۴م کال کې د داعش په نوم ګوند هم وسلې ته لاس کړ خو اوس چې د اسد پلوو ځواکونو د روسیې او ایران په مستقیم ملاتړ او قومانده د حلب ښار بیرته له داعش او مخالفینو ونیو نو یې پر عامو خلکو بې دریغه فجایع ترسره کړل آن چې د ادلب ښار په خان شیخون کلې یې په نیمه شپه کیمیاوي بمونه وغورځولو او په خواږه خوب ویده خلک یې چې زیاترته یې ښځې او ماشومان و په ډیرې بې دردۍ سره ووژل.
امریکا د اسد حکومت تیره سه شنبه تورن کړ چې په سوریه کې یې پر ولسې وګړو کیمیاوي مواد استعمال کړي دي نو پر خلاف یې په نظامي هوايي اډه شپیته توغندې وتوغول.
ټرمپ غواړي د سوریې ظالم رژیم هم د عراق د سفاک رژیم پر برخلیک اخته کړي، د اسد سره هم هغه عمل وکړي کوم یې چې د صدام سره وکړ او هڅه کوي چې د ځان لپاره د بین المللي نورومونو سره سم پر سوریه د تیري جواز ترلاسه کړي او بیا پرې برید پیل کړي. داسې بریښي چې امریکا به ترهغې د اسد پر هوایي او ځمکنیو پوځي مرکزونو خپلو توغوندويي او نورو بریدونو ته ادامه ورکړي څو د اسد حکومت وپرزوي.
امریکا په ټوله نړۍ کې د ترهګرۍ تر څنګه پر نورو کمزورو هیوادونو خپل راج پیل کړی دی؛ په افغانستان کې یې د امن را وستلو په نامه شپاړس کاله جګړه وکړه او لا هم روانه ده په عراق کې یې کورونه یا کلي نه، بلکې ښارونه او ولایتونه یې د جګړې په اورکې وسوځول. امریکا په نظر کې لري چې سوریه د عراق په برخلیک اخته کړي.
روسیې او ایران د اسد پر خلاف د امریکا توغوندويي برید غندلی او دا عمل یې د تروریزم د له منځه وړلو پرخلاف ناسم بللی، روسیې پر سوریه د امریکا د توغوندویي برید په غبرګون کې ویلي چې د امریکا دا عمل په نړۍ کې د تروریزم سره مبارزه نوره هم پیچلې کوي.
ټوله نړۍ او نړیواله ټولنه دا مني چې امریکا د سوریې پر جابر رژیم برید وکړ؛ خو د ایران او روسیې په څیر یې لا خپل ښکاره غبرګون نه دی څرګند کړی. که څه هم یو شمیر هېوادونو لکه سعودي عربستان، ترکیه، بریتانیا، فرانسه، ایټالیا او اسرائیلو پر سوریه د امریکا د برید ملاتړکړی دی خو هغو اسلامي هیوادونو چې د امریکا د برید ملاتړ یې کړی او یا یې کوي هغوی دې هم په دې پوه شی چې پر خپلو خلکو له ظلم او جبر نه لاس واخلي کنه نو برخلیک به یې د عراق، افغانستان او سوریې په څیر وي.
