ليکوال : امين وردګ
هغه وړاندې ورځو کې چې روسانو او چينايانو د (افغانستان اسلامي امارت) ته منسوب نظاميان- يو افغاني قوت وبللو او له هغوى سره يې سوله يو موفق ګام ياد کړ ؛ نو دولتي چارواکو او پلويانو يې داسې انګېزه ورکړه ؛ چې ګواکي طالبان د روسيې خلک دي.
تر دې پخوا به يې ويل چې “طالبان پاکستاني فوجيان دي” کله کله به يې بيا وويل چې دا د ISI خلک دي ، يا د CIA جاسوسان دي.
زه چې کله د دغه ړانده نظام دا ړندې ادعاوې او ړانده دلائل وګورم نو خندا راشي !
مګر کوم وخت چې ثبوت ترې وغواړې ؛ نو بيا د هاغو مظلومو بنديانو انځورونه درته وړاندې کړي ؛ چې دوى د (خپلو تور سرو) جامې ور اغوستې او انځورونه يې ترې اخيستي وي.
يا د پاکستان د (جميعت علماء اسلام) ګوند ته منسوبو هغو ملايانو انځورونه درته پورته کوي ؛ چې له پنجابي فوجيانو يا پوليسو سره ناست وي.
کله داسې دلائل وايي چې دا طالبان ولې په پاکستان کې جهاد نه کوي چې په افغانستان کې لګيا دي ؟
زه نه پوهېږم چې دا خلک ولې دومره له منطق نه ليرې پوښتنې او اداعاګانې کوي ؟
اوس نو د افغان طالبانو يې د پاکستان په جهاد څه ؟
په پاکستان کې که جهاد کوي هغه به پاکستانيان کوي نه افغان پناه اخيستونکي او مهاجر.
اوس که چېرې زموږ کور ته غله راشي ؛ نو آيا موږ به خپل کور غلو ته پرېږدو او د ليرې ګاونډ کورته به ورځو او غله به ترې شړو ؟
دا کار خو اصولي نه دى.
بل ! آيا داسې انځورونه به سخت وي ؛ چې يوه بندي ته د ښځې جامې ور واغوستل شي او بيا کامره ورته و نيول شي؟
دا چې اوس افغان طالبانو ته د روسانو خلک وايي ؛ آيا داسې ادعا کوم ثبوت لري ؟ که يې لري نو ولې يې ملت ته نه وړاندې کوي ؟
آيا د دښمن د (کمزورتيا اعتراف) د هغه د بادارۍ نښانه بللاى شو ؟
والله چې دا ډول ادعاګانې خو د عاقلو خلکو کار نه شم بللاى !
زه قسم اخلم ؛ چې د امارت د پاره خصوصي کار نه کوم ، صرف حق ته ګورم ؛ که د افغانستان او پاکستان فعلي نظامونه د شريعت تابع شول ؛ نو دواړه زما د سر سترګې دي او که همداسې وي لکه دا دي چې ! نو قسم که يې هېڅکله هم پلوي وکړم .
امارت هم داسې !
که يې قانون شرعي ٶ هر فرد به يې په اوږو وړم او تر نوم به يې نثارېږم ؛ مګر که مې د شريعت خلاف څه پکې وليدل او غږ مې پورته نه کړ ؛ نو زه به خائن او غدار وم.
د دولت کارکوونکي هم زموږ تربرونه دي د امارت کارکوونکي هم !
دولت هم له افغانانو جوړ دى ، امارت هم او دا يو حقيقت دى چې د حق پلويان يې بايد ومني ؛ تفاوت يې يوازې په اداري جوړښت او اهدافو کې دى ؛ کنه د ډېرو پلارونو به يو زوى عسکر او بل طالب وي.
اسلامي امارت شرعي نظام غواړي ؛ مګر دولت بيا د شرعي نظام مخالف دى ؛ اګر که ((دغه خپل جوړ شوي قانون [اساسي قانون] ته شرعي جواز هم ورکوي !؟)) استغفرالله ؛ همدغه ډول دليلونه يې موږ ته کوټې کوټې پوښتنې پيدا کوي.
موږ بايد فکر وکړو .
اساسي قانون بايد يو ځل مطالعه او بيا يې له شرعي قانون سره مقائسه کړو ، که دغه قانون له هغه قانون سره ضد وي نو بيا ولې د کفر خوښ قانون ته د الله قانون ووايو او ويې منو ؟
دا چې ځينې خلک طالبانو ته پاکستانيان يا هم د هغوى غلامان وايي ؛ دا تشه او پوچه ادعا ده.
زما په اند ؛ دوى هېڅ کوم ثبوت او دليل نه لري ؛ صرف د پاکستانۍ پاليسۍ اجېنټان دي چې دغه ډول خبرې د خلکو غوږونو ته رسوي ؛ تر څو په راتلونکي کې د غربيانو غاښ ماتوونکي پنجابيان وليکل شي او د افغان خاورې آزادوونکي هم پاکستانيان.
تاسو به دا خبره ډېره له دولتي عساکرو آورېدلې وي چې وايي : “په کونړ ، هلمند ، خوست ، کندوز ، بدخشان او کندهار کې د ناټو او دولت په وړاندې پاکستاني فوجيان جګړې کوي” ؟
نو لږ فکر وکړئ ! آيا داسې ادعا به د پنجاب په ګټه او د افغانانو په تاوان نه وي ؟
اوس يې نو دا بله بدله هم زده کړې چې وايي : “طالبان د روسانو خلک دي”
دا هم د روسانو په هوښيارۍ او د پخوانيو کمونستانو په وفا دلالت کوي.
سبا به روس وايي چې “موږ له آمريکا نه په افغانستان کې ځلې بيا خپل بدل واخيست”
لکه آمريکا چې پخواني شوروي ته طعنې ورکولې.
زه وام خداى ته وګورئ افغانانو ! لږ ويښ او هوښيار شئ ؛ دا د ماشومانو خيالونو او دليلونه پرېږدئ .
د وياړ ورځې بيخي نږدې شوې دي ؛ هسې دا خپل ځلاند تاريخ په روس او پنجاب مه پلورئ.
نور د پنجاب له مزدورئ لاس واخلئ او تاسو هم لږ شرم وکړئ ؛ اې د پخواني خلق او پرچم زامنو !
نور مو خپلو بادارانو ته کمپينونه مه کوئ.
جهاد افغانانو کړى او افغانان يې کوي او هم به يې افغانان ګټي ان شاءالله
دا چې بيا به څه کيږي هغه به د هغه وخت خبره وي.
