رحمت الله نړیوال
د هجران غشي دي اوري زما پر زړه باندي جانانه
له هر سمت او له هر لوري زما پر زړه باندي جانانه
ساعت ورځ، ورځ شي کلونه لا اوږده شي شبګیرونه
د دردو لړۍ شي پوري زما په زړه باندي جانانه
ستا يادونو شپول نیولی زما د فکر په فلک کې
را تاو شوي راڼه ستوري زما پر زړه باندي جانانه
د امید کښتۍ مي درومي د وصال په ارمانو دي
لاغوټې وهي هم نوري زما پر زړه باندي جانانه
د لقا شراب دي وتي زموږ د چم له بازارګې نه
په یو نرخ یې هم نه پلوري زما پر زړه باندي جانانه
د خيالو مرغه مي ګرځي ستا دکلي په کوڅو کې
و ديدار ته لارې ګوري زما پر زړه باندي جانانه
نور بیلتون کړه را نه ختم نور مي وصل کړه جانانه
مړاوي هیلې کړه سمسوري زما پر زړه باندي جانانه
نور څه نشته “نړیوال” به په همدې ځان تسلي کړم
پري لیکم دي د نوم توري زما پر زړه باندي جانانه
