امین وردګ
امريکې او متحدینو یې یو ځل بیا د افغان طالبانو پر وړاندې ګواښ کړی چې څلور زره (۴۰۰۰) عسکر به په داسې حال کې افغانستان ته رالېږي چې لږ وړاندې یې یولک او دېرشو زرو (۱۳۰۰۰۰) مجهزو او په عصري تکنالوژۍ سمبالو وسلوالو ماتې پکې وخوړه ! خو دا ځل یې د افغان طالبانو د ګواښلو تر څنګ په پاکستان هم غږ کړی چې باید په خپلو سيمو کې افغان طالبان له منځه یوسي (فقط ته وا د ټولو ملکونو مشران د ده مامورین دي) او دغه غږ ټرمپ خان لالا کړی ؛ چې هغه د پخوانیو سادګانو خبره (ځانته اینجه بیا هم وايي) هسې مال موږ افغانانو خو نړۍ ته افغانیت او اسلامي اخووت وښود او د یوه اسامه ابن لادن له امله مو په لکهونو بچي ، جوړ نظام او آن خپل کلي او کورونه له لاسه ورکړل او موږ لا هم دا دی کړيږي ، ځوريږو او ځپل کيږو مګر دغې قربانۍ ته د نړۍ په هېڅ ګوټ کې بل څوک تیار نه وو ؛ خو متأسفانه چې همغه عرب ځوان آخر هم (اسلام آباد ته نږدې) په اېبټ آباد کې په داسې حال کې د خاصو امرکايي کمانډویانو له خوا شهید شو چې په خپلو الوتکو کې ورته راغلي وو او د پاکستان حکومت یې لا خبر کړی هم نه ؤ ؛ که څه هم چې پاکستان وايي : زموږ ملک زموږ په واک کې دی ! مګر کله کله يې له واکه وزي ! شاید چې د کمزورۍ ، ډېر فشار او یا د ډېرو پیسو له امله به وي ؟ والله اعلم !
نو هسې مال چې اوس به نو ته وا آمریکا ته څه ووایي ؟ آیا هغه افغان طالبان به لاستړلي ورته وسپاري چې ځينو به يې ریښتیا هم د پاکستان تر اوسني قلمرو لاندې په کوزه پښتونخوا کې سیاسي پناه اخيستې وي او پاکستاني حکومت به يې د امن تضمین هم کړی وي لکه : اختر محمد منصور ، ډاکټر نصیرالدين حقاني ، بدرالدين حقاني او سلګونو دغو ته ورته نورو ځوانانو غوندې ؟ که به یې په خپلو لاسونو باندې تورو جيلونو ته ټېل وهي لکه : د هلمند والي ملا عبدالمنان آخند ، ملا برادر آخند ، زما ګران استاد ! استاد محمد یاسر وردګ ، د کندز والي ملاعبدالسلام آخند او په سلګونو هغو نورو افغان طالبان غوندې چې په میرانشاه او ميرله کې يې ونيول او بیا يې د تورو تمبو شاته واچوول ؛ چې اوس هم په جېلونو کې د خپل تیاره برخلیک په تمه شپې او ورځې تېروي ، هغه هم په داسې حالت کې چې نه څوک د یوه بندي په توګه حقوق ورکوي او نه یې چاته درک شته چې چېرې دي ؟ ژوندي دي او که مړه ؟ او که به له امریکې څخه و نه ډار شي او خپل ایماني زور به ورته ښکاره کړي ؟ کله موږ چې په 2001 م کال کې ورته و ښود ؟ مانا دا چې انکار به وکړي او که به ځواب ورکړي؟ له اوضاع نه خو داسې معلوميږي چې افغان طالبان په ټوله نړۍ کې د یوې ورځې آرام تېرولو ځای هم نه لري او هغه ړانده چې وايي : ((افغان طالبان په پاکستان کې امن ځایونه لري)) یقيني چې هغوی څومره له منطقه ليرې او ړوند استدلال کوي ، قسم په الله چې د افغان طالبانو په حال د هر باوجدانه انسان زړه باید درد وکړي ! ما به هم یو وخت کې دا خبره کوله چې ګواکي طالب مشران به آرام او سوکاله وي ، یوازې کشران به يې ستونزې ګالي ؟ مګر کله مې چې تحقیق وکړ او حالات راته معلوم شول ، نو قسم په الله ! داسې ژوندونه یې دي لکه په سره تبۍ چې څوک ناست وي او هېڅ طاقت یې نه کيږي. هسې که څوک په الله باور کوئ نو دا خبره د ومني چې زه د طالبانو د پاره تبلیغ نه کوم ؛ چې تاسو اوس بیا په کمېنټونو کې ښکنځلو ته کش ورکړی ! یوازې له دې امله مې زړه بديږي چې طالبان افغانان دي ؛ خو نه یوازې دا چې په خپل کلي کې د ژوند کولو حق څوک نه ورکوي ، بلکې نړۍ هم دوکې ورسره کوي ، ټول لکه ښکارزنان هغه خپل ښکار ته ! داسې (ويتې) خولې ورته ناست دي ؛ له یوې خوا يې دوست ګڼي او خواخوږي ورسره کوي ، له بلې خوا يې په شارګونو کې په خنجر و هي ، زه وایم چې ګورئ ! دا وخت تېريږي ، سبا به بیا دغه د غرب مزدوران څنګه پورته ګوري لکه نن چې خلقیان او پرچمیان خجل دي! آخر دا نړیوال څه ډول د بشر حقوقو ته ژمن دي ؟ آیا طالب په ټوله نړۍ کې د ژوند کولو حق نه لري ؟ زه په خپل آند داسې وايم : زما د په الله قسم وي چې په طالب ځمکه سره شي ؛ هغه نخرې خو ووینئ چې په تاريخ کې مو نه وي ليدلې ! تاریخ راوړي او وایي : کله چې سلطان صلاح الدين ایوبي بیت المقدس کلابند کړ نو یې ملګرو ورته وویل چې : ټول غاصب اسرائيل به نن وژنو او همدا يې وخت دی ؛ تر څو نړۍ له دغو شريرو څخه خلاصه شي ؟ ایوبي صاحب ورته وویل چې نه ! که تاسو له دوی څخه د ژوند کولو حق واخلئ او هغوی په دغې نکته پوه شي چې ګواکي : نور ژوند نشو کولای ؛ نو په لومړي قدم کې بیت المقدس او زموږ د محمد رسول الله (ص) صخره ورانوي ، بیا خپل ماشومان او تورسرې وژني ، له هغه وروسته بیا دوی له تاسو سره تر آخري سلګۍ جګړه هم کوي ؛ چې په داسې حال کې خو لومړی د جګړې د بایللو امکان هم شته او که فرض کړه ! موږ بریالي شو ؛ نو بیا به ړنګ ـ بنګ ښار ، له منځه تللي مقدسات او د تورسرو او ماشومانو مړه اجساد به څه کړو ؟ نړۍ به هم را توف کوي چې : مسلمانان بې رحمه او وحشیان وو قتل عام یې وکړ هلته بیا څوک دا نه وايي چې پلارونو یې اولادونه ووژل ، بلکې موږ به یاديږو ؟ خو ملګري یې بیا هم ټينګ شول چې نه ! جګړه ورسره کوو ، دا خو ستا اټکل دی چې داسې به وکړي ، کېدای شي دغسې نشي لکه ته چې اټکل کوې ؟ لنډه دا چې ایوبي صاحب دوی خفه نکړل ؛ خو کله چې د اسرائیلو استازی ورته راغی نو دوی ورته وویل چې : یا تسليم شئ او یا جګړې ته را ووزئ ؟ نو هغه قاصد همغه د صلاح الدين ایوبي له اټکل سره سمه خبره ورته وکړه او ويې ویل چې : موږ داسې تصمیم لرو نوره مو خوښه ؟ وروسته ملګرو صلاح الدين ایوبي ته وویل چې په ريښتیا ته هوښیار امیر يې ! بیا صلاح الدین صاحب په همغه پیمان د قدس له اسرائيلو سره لاسلیک وکړ چې امیرالمؤمنین (حضرت عمر فاروق) ورسره لیکلی او امضا کړی ؤ ؛ مګر ده هغه یهود ټول د قدس له ښاره و ایستل چې له اروپا نه سل کاله وړاندې د قدس ښار ته راغلي وو او د مسلمانانو ځمکې يې قبضه کړې وې ، یوازې د یورشلم یهودان یې پرېښوول. نو اوس هم ! که په طالبانو ځمکه سره شوه ، کېدای شي ډېرې خرابۍ لا وکړي ؛ چې اوس به یې سړی تصور هم نشي کولای ؛ نو جګړه د حل لاره نه ده ! که څوک ريښتيني افغانان وي او افغانۍ شيدې یې رودلې وي او یا پاکستانیان ريښتينې ورورولۍ او ګاونډيتوب ته ژمن وي ؛ نو باید د افغان طالبانو خبرې واوري او ستونزې ورسره حلې کړي ، که دا کار و نه کړي نو د سبا تاريخي مسئولیت به د دوی په اوږو بار وي. زه نه وايم چې یوزاې د طالبانو خبرې سمې دي نورې ټولې غلطې ! خو زه وایم چې یو ځل خو د واورېدل شي : که کومه یوه پکې ناروا وه هغه د ليرې شي ؛ مګر داسې نو نه کيږي لکه اشرف غني چې وايي ((یا تسلیم شئ او یا د مرګ تیاری و نيسئ )) دا اوس خبره ده ؟ هغوی راوتلي مرګ ته دي ، خانجان بانجان یې له مرګه وېروي ، فقط ته وا له عزرائیل (علیه السلام) سره يې په دې اړه کومه خبره کړې.
