په پتلون کې لمونځ کول
پوښتنه : د پتلون اغوستلو په وخت کې (کوم چې د انګريزانو لباس دى) لمونځ کيژي او که نه؟.
ځواب : په کوم ځاى کې چې د پتلون اغوستل د کفارو ځانګړى شعار وي هلته يې اغوستل ناروا دي، او په هغه کې لمونځ کول مکروه دي ([1]).
د لمانځه پر مهال د مور له سينو څخه د شيدو رودل
پوښتنه : يوه ښځه لمونځ کوي، کله چې هغه التحيات ته کيناسته نو د هغې زوى راغى او د هغې له سينې (تيونو) څخه يې شيدې وڅښلې، ښځې هيڅ عمل کثير يا حرکت نه دى کړى او د کوچني له منع کولو پرته يې لمونځ پوره کړ، آيا په داسې صورت کې د هغې لمونځ صحي دى او که نه؟.
ځواب : د لمانځه په وخت کې کوچني ته دومره موقع ورکول چې هغه د شيدو تر ځايه ورسيژي او باقاعده شيدې وڅښي دا د ښځې عمل کثير بلل کيژي، لهذا که چيرته په رښتيا همداسې صورت مخته راشي نو لمونځ فاسديژي او راګرځول يې ضروري دي ([2]).
که په لمانځه کې له سر څخه خولۍ (ټوپۍ) وغورځي څه کول پکار دي
پوښتنه : د لمانځه نيت وتړل شو او له هغه وروسته د قيام (ولاړې) په حالت کې له سر څخه خولۍ (ټوپۍ) په څه ډول وغورځيده نو څه حکم دى؟ هغه راپورته کولى او په سر کولاى شي او که نه؟.
ځواب : په لمانځه کې د وقيام (ولاړې) يا رکوع په حالت د غورځيدلې خولۍ را پورته کول او په سر کول روا نه دي، عمل کثير شمارل کيژي، د کوم له امله چې لمونځ ماتيژي، البته د سجده په حالت کې د سر وړاندې غورځيدلې خولۍ په عمل قليل سره يعنې چې په يوه لاس يې راواخلي او په سر يې کړي نو اجازت شته، بلکې بهتر دي، په دې سره په لمانځه کې خرابوالى نه راځي ([3]).
په ناپاک ځاى باندې د جامه غوړولو په حال کې لمونځ کول
پوښتنه : که په ناپاک ځاى باندې پاکه جامه وغوړول شي او لمونځ پرې کوي نو لمونځ کيژي او که نه؟.
ځواب : لمونځ کيژي، خو په دې شرط چې جامه به دومره غټه (پيړه) وي چې د هغې نه د لاندې نجاست (پليتي) به نه تر سترګو کيژي (نه به ليدل کيژي) ([4]).
په تياره کې لمونځ کول
پوښتنه : په تياره کې لمونځ کول روا دي او که نه؟.
ځواب : که چيرته د قبلې رخ صحي وو نو په تياره کې لمونځ کول منع نه دي ([5]).
په شيشه کې د بندو متيازو په جيب کې ساتلو سره لمونځ نه کيژي
پوښتنه : که چيرته يو کس د ټيسټ لپاره متيازې وړي او په لار کې د لمانځه وخت شي، دا چې متيازې د شيشې په بوتل کې بندې دي نو هغه په جيب کې ژدي او لمونځ کوي، پوښتنه دا ده چې په داسې صورت کې لمونځ کيژي او که نه؟.
ځواب : نجاست چې تر څو پورې په خپل ځاى کې وي نو د لمانځه او بل څه لپاره مانع نه وي، له خپل اصلي ځاى نه له راوتلو وروسته هغه که په شيشه يا بل څه کې بندې کړى شي نو دلمانځه لپاره مانع کيژي، د متيازو اصلي ځاى مثانه ده، په مثانه کې د وجود په وخت کې د لمانځه مانع نه دي، په مذکوره صورت کې چونکه شيشه د متيازو اصلي ځاى نه دى له همدې امله د داسې کس لمونځ نه کيژي او د داسې لمانځه راګرځول ضروري دي ([6]).
د سنتو له اداء کولو وروسته دنيوي خبرې
پوښتنه : د سهار او ماسپښين د سنت مؤکده له اداء کولو وروسته په دنيوي خبرو کې مشغوليدل سنت باطلوي که ثواب؟.
ځواب : د ځينې فقهاؤ په نزد د فرض او سنت مؤکده په مينځ کې په دنيوي خبرو سره سنت باطليژي، مګر قوي دا ده چې سنت نه باطليژي، البته ثواب کميژي ([7]).
سجدې ته د تلو په وخت کې د جامې راټولول
پوښتنه : يو شمير خلک داسې عادت لري چې په لمانځه کې سجدې ته د تلو په وخت کې پاجامه راټولوي، داسې کول مکروه تحريمي دي او که مکروه تنزيهي؟.
ځواب : داسې کول مکروه تحريمي دي ([8]).
په پټه کړى شوې خوله لمونځ کول مکروه دي
پوښتنه : د يخ (سړو) په موسم کې زياتره خلک خوله پټه کړي او لمونځ کوي، په څادر يا دسمال باندې چې خوله پټه کړى شي نو د لمانځه حکم څه دى؟.
ځواب : په څادر يا دسمال باندې د خولې پټولو په صورت کې لمونځ صحي نه دى، د خولې او پوزې پټولو په وخت کې لمونځ کول مکروه دي ([9]).
د ژيرې نه لرونکي لمونځ
پوښتنه : آيا دا صحي ده چې کوم سړى ژيره نلري د هغه لمونځ مکروه کيژي؟.
ځواب : ژيره وهل او خريل حرام دي او د حرام فعل اثر په لمانځه کې هم وي، له همدې امله که لمونځ مکروه شي نو څه بعيده نه ده ([10]).
په لمانځه کې د عمل کثير حکم
پوښتنه : په عمل کثير سره لمونځ فاسديژي، که چيرته عمل کثير د لمانځه فاسد کونکى وي نو د هغه اندازه څه ده؟.
ځواب : هو ! په عمل کثير سره لمونځ فاسديژي، عمل کثير هغه عمل ته ويل کيژي چې لمونځ کونکى سړى په لمانځه کې کوم داسې عمل کوي چې له ليرې څخه ليدونکى کس دا ګمان وکړي چې هغه سړى لمونځ نکوي ([11]).
([1]) فتاوى محموديه، ٦ : ٦٦٥، بحواله : نفع المفتي والسائل، الثياب التي تکره الصلاة فيها، وما يتعلق به، من مجموعة الرسائل اللکنوي، ج : ٤، ص : ١١٤.
([2]) فتاوى عباد الرحمن، ٢ : ١٠٢، بحواله : الدرالمختار، ج : ١، ص : ٦٢٨، التاتار خانية، ج : ١، ص : ٤٢٨، النهر الفائق، ج : ١، ص : ٢٧٣.
([3]) فتاوى رحيميه، ٥ : ١٢٦، بحواله : درمختار مع شامي، ج : ١، ص : ٦٠٠، باب ما يفسد الصلوة وما يکره فيها.
([4]) احسن الفتاوى، ٣ : ٤٠٤، بحواله : ردالمحتار، ج : ١، ص : ٣٧٤.
([5]) فتاوى محموديه، ٦ : ٦٨٤، بحواله : صحيح البخاري، باب التطوع خلف المرءة، ج : ١، ص : ٧٣، وکذا في الدرالمختار، باب شروط الصلوة، ج : ١، ص : ٤٣٣، وکذا في البحر الرائق، باب شروط الصلوة، ج : ١، ص : ٥٠٠.
([6]) فتاوى عباد الرحمن، ٢ : ١٠٦، بحواله : الشامية، ج : ١، ص : ٤٠٣، البحر، ج : ١، ص : ٢٦٧، الهندية، ج : ١، ص : ٦٢.
([7]) فتاوى رحيميه، ٥ : ١٣٦، بحواله : شامي، ج : ١، ص : ٦٣٦، باب الوتر والنوافل.
([8]) احسن الفتاوى، ٣ : ٤٠٧، بحواله : ردالمحتار، ج : ١، ص : ٥٩٨.
([9]) فتاوى عباد الرحمن، ٢ : ١١٠، بحواله : الهندية، ج : ١، ص : ١٠٧، حاشية الطحاوي علي مراقي الفلاح، ص : ١٩٣.
([10]) آپکى مسايل اور انکا حل، ٣ : ٥٤٩، بحواله : صحيح مسلم، ج : ١، ص : ١٢٩، فتاوى شامي، ج : ٢، ص : ٤١٨، باب ما يفسد الصلوة وما لايفسده مطلب في الاخذ من اللحية، فتح القدير، ج : ٢، ص : ٧٧، البحر، ج : ٢، ص : ٢٠٢.
([11]) فتاوى عباد الرحمن، ٢ : ١١١، بحواله : شرح التنوير، ج : ٢، ص : ٣٨٤ ٠ ٣٨٥.
