درې مياشتې د مخه د پاکستان د بهرنيو چارو وزارت خبري رسنيو ته ويلي وو، چې په راتلونکي د سمبر کې به په اسلام اباد کې د اسيا زړه په نامه کنفرانس جوړوي او د سېمې هېوادونو ته يې بلن ليکونه لېږلي. تېره مياشت د پاکستان د بهرنيو چارو وزارت رسنيو ته وويل چې افغانستان او هندوستان ته يې هم بلنليکونه ليږلي دي ؛ خو د افغانستان او اسلام اباد د اړيکو په خړپړتيا او هم دهند سره داړيکو د ناڅرګنديدا له امله هند او افغانستان دواړو هېوادونو په اسيا زړه کنفرانس کې د ګډون ډاډ نه دی ورکړی. نن د پاکستان د بهرنيو چارو وزارت او د نواز شريف سلا کار وزير سرتاج عزيز وويل، چې سبا د دسمبر په اتمه(۸) مه به دهند د بهرنيو چارو وزیره سوراج او د افغانستان ولسمشر اشرف غني په اسيازړه کنفرانس کې برخه واخلي يوه مياشت د مخه چې په اسلام اباد کې د اسيا زړه کنفرانس د جوړيدا دپاره غور کيده ؛ نو د افغانستان سره د اړيکو په ښه والي غور وشو. که د کابل او اسلام اباد اړيکې خړې وي ، نو امکان نلري چې افغان صدر د اسيا په زړه کنفرانس کې برخه واخلي. د پاکستان د بهرنيو چارو وزارت د افتاب احمد خان شيرپاو ، اسفنديار ولي او محمود خان اڅکزي په مشرۍ د دوستۍ او اړيکو د ښه والي لپاره يو پلاوی کابل ته واستاوه چې د دې پلاوي په وسيله د کابل اسلام اباد په اړيکو کې ښه والی راشي ، خو دا چې سبا به د اسيا زړه په کنفرانس کې د سېمې هېوادونه ،لکه: ترکمنستان ،تاجکستان، ازبکستان او نور چې د پاکستان د بهرنيو چارو وزارت ورته بلنليکونه لېږلي دي ، د سېمې دامن او اړتيا وړ لکه تجارت ، اقتصاد ، د نا امنيو پرخلاف مبارزه ، او نورو مسايلو بحثونه کېږي، نتايج به يې تر کنفرانس وروسته څرګند شي. خو د سرتاج عزيز په وينا په کنفرانس کې به زيات زور د افغانستان دمسئلې د حل په اړه چې د طالبانو او کابل دولت ترمنځ د مذاکراتو سلسله جاري وساتل شي او په پای کې د يوې دايمې سولې دپاره زمينه برابره کړل شي.
د افغان دولت او طالبانو ترمنځ د مذاکراتو لپاره د تېرې مۍ مياشتې په ۳ـ۲ دوه ورځني سيمنار کې چې په قطر کې جوړ شوی و او له هغې را وروسته په دواړو خواوو د پلاوو په برخه اخیستنه په اسلام اباد مري او چين کې غونډې شوي. څه وخت چې د ملامحمدعمر د مړينې خبر رسنيو خپورکړ، مذاکرات په بشپړه توګه ودريدل. دا چې د اسيا زړه په کنفرانس کې به د سيمي او ګاونډيو هېوادونو اخلاص څومره وي؟ نتايج به يې رابرسېره شي ؛ خو افغان ولس چې د ۱۴کلونو په دوام د افغانستان د مسئلې حل وعدې په شعار بدلي شوي دومره اميد نلري چې د اسلام اباد اسيازړه په کنفرانس کې به د افغانستان د مسئلې د حل لپاره د پای ټکی کېښودل شي. خو دا هيله يې شته چې په کامله توګه دريدلي مذاکرات خو به بيا پېل شي او دا هيله هم شته که ګاونډي او د سېمې هېوادونو د افغانستان سره د زړه له اخلاصه په اسيا زړه کنفرانس کې ژمنه وکړي چې نور به يوازې د افغانستان نه بلکې دسېمې دامن لپاره د زړه له تله د تلپاتي امن او سولې هېڅې کوي افغانان په دې هېله دي چې ټول عمر به د افغانستان په اسمان د جګړې ورېځې نه ګرځي يوه ورځ خو به د امن څرک هم سر راووهي.
